DILI, 30 janeiru 2024 (TATOLI)—Centro Nacional Chega, Institutu Públiku (CNC, I.P), iha tinan ne’e, sei finaliza uma memória esperansa unidade haat, ne’ebé hanesan apoia ba sobrevivente konflitu pasadu Timor-Leste.
“Uma ne’ebé halo ona iha tinan kotuk ba sobrevivente sira, tinan ne’e ita sei koko finaliza tolu tan ne’ebé seidauk konstrui hotu, tanba uma ida foin mak inaugura iha semana tolu liubá, entaun sei iha uma tolu,” Diretór Ezekutivu CNC, I.P, Hugo Maria Fernandes, informa ba Agência Tatoli, via telefónika, tersa ne’e.
Notísia relevante :CNC, I.P sei apoiu uma ba sobrevivente haat
Nia dehan, CNC, I.P hahú ona halo diskusaun ho Ministériu Administrasaun Estatál (MAP) liuhosi Programa Nasionál Dezenvolvimentu Suku (PNDS), hodi liuhosi programa ne’e bele oferese uma ba sobrevivente sira.
“Tinan ne’e, apoia direitamente hanesan tinan kotuk ne’e laiha ona, maibé ita halo parseria ho MAE atubele apoia sobrevivente sira liuhusi PNDS bainhira atu apoia Uma ba Povu,” nia akresenta.
Tuir Diretór, sobrevivente ne’ebé CNC, I.P hili atu hetan uma ne’e merese duni atu hetan, tanba programa ne’e hanesan parte ida hosi reparasaun ba vítima no sobrevivente sira.
CNC, I.P iha tinan 2022 konsege apoia uma memória esperansa ba sobrevivente konflitu pasadu hamutuk 15 no iha tinan 2023 ne’e sei oferese tan uma unidade haat, ne’ebé ninia kontrusaun sei konklui iha tinan 2024.
Jornalista : Arminda Fonseca
Editora : Julia Chatarina
