OÉ-CUSSE, 01 fevereiru 2024 (TATOLI) – Primeiru Ministru (PM), Kay Rala Xanana Gusmão, ohin to’o ona iha Naktuka-Citrana iha suku Bene-Ufe, Sub-Rejiaun, Nítibe Rejiaun Administrativa Espesiál Oé-Cusse Ambeno (RAEOA), hodi ko’alia ho abitante lokál iha area Naktuka.
Notísia relevante: Xanana seidauk foti desizaun kona-ba Naktuka
Observasaun jornalista Agência Tatoli iha Naktuka, daudaun ne’e Xefe Governu ho membru governu balun no ekipa Gabinete Delimitasaun Fronteira Marítima no Terrestre, to’o ona iha Naktuka-Citrana iha suku Bene-Ufe, Sub-Rejiaun Nítibe, Rejiaun Administrativa Espesiál Oé-Cusse Ambeno (RAEOA).
Tomás da Costa Elo, nu’udar natar na’in iha Naktuka, informa kintál ne’ebé sira halo natar ne’e dezde uluk kedas.
“Ami kontinua mai servisu iha-ne’e, tanba ne’e ami-nia rai kintál dezde uluk, ne’ebé ami mai servisu iha ami-nia to’os no natar iha ne’e,” nia informa ba Tatoli iha Naktuka.
Iha momentu monta estaka ne’e Tomás da Costa Elo hatene, maibé nia la komprende kona-bá estaka hirak-ne’e.
“Ami mós to’o agora, seidauk hatene katak, rai ne’e sei ba Indonézia ka Timor-Leste. Ne’e desizaun ema-boot sira-nian. Maibé ami nu’udar komunidade hanesan to’os nain ami kontinua servisu,” nia hateten.
“Komunidade sira, hamutuk ho lia-na’in kulturál suku Bene-Ufe, ami hein ita-nia Primeiru Ministru atu mai esplika kona-bá polémika fronteira Naktuka, ida-ne’e importante atu ita-nia komunidade sira komprende,” Xefe suku Bene-Ufe, Marcos Meni, ba Agência Tatoli, hafoin partisipa iha serimónia pose ba autoridade foun iha otél ambeno, kinta ne’e.
Entretantu, iha loron 26 janieru 2024 ne’e, Primeiru Ministru hala’o enkontru bilaterál ho Prezidente Repúblika Indonézia, Jokowi iha Istana Bogor, Jarkarta hodi ko’alia kona-bá finalizasaun fronteira terrestre.
Liu-liu iha segimentu rua hanesan, Noelbesi-Citrana iha sub-rejiaun Nítibe hanesan fronteira ho Kupang NTT no Oé-Cusse Ambeno.
Nune’e mós Bijael Sunan-Oben iha sub-rejiaun Pássabe hanesan fronteira ho TTU parte NTT nian no Oé-Cusse Ambeno ho medida aktare 142,7.
Purtantu, Primeiru Ministru Kay Rala Xanana Gusmão, sei ko’alia ho Governu Lokál NTT atu haree ba kestaun fronteira no haree ba povu NTT no Oé-Cusse nia moris di’ak.
Tanba, nia dehan, iha enkontru bilaterál ho Prezidente Repúblika (PR) Indonézia Jokowi foin lalais ne’e, ko’alia mós kona-bá povu NTT no Oé-Cusse, tanba enkontru bilaterál ne’e ho intensaun atu dezenvolve Oé-Cusse.
Maibé iha enkontru ofisiál ne’e seidauk bele asina akordu formál ruma ba fronteira terrestre tanba seidauk iha konsensu.
Notísia relevante: Ohin, Xanana dezloka bá Naktuka
Jornalista: Abílio Elo Nini
Editór: Evaristo Soares Martins
