VIQUEQUE, 02 fevereiru 2024 (TATOLI)— Komunidade agrikultór iha suku Matahoi, Postu Administrativu Uatulari, munisípiu Viqueque husu ba empreza Saerubu Unipesoál, Lda, atu aselera projetu reabilitasaun irrigasaun Belia dahuluk no daruak atu fasilita halo natar.
“Ami husu ba empreza responsavél ba projetu reabilita ba irrigasaun Belia 1 no 2, tanba tempu halo natar besik daudaun ona, maibé empreza to’o agora seidauk finaliza projetu ne’e . Nune’e difikulta tebes atu kanaliza bee ba ami-nia natar hodi ami hala’i natar no kuda haré”, Reprezentante Agrikultór, Agustino Pinto, hatete ba Agência TATOLI,I.P, iha postu administrativu Uatulari, sesta ne’e.
Razaun husu aselera projetu, nia dehan tanba daudaun tama ona ba fevereiru, nune’e ba marsu ne’e agrikultór sira hahú hala’i ona natar, maibé empreza seidauk finaliza projetu ne’e bele difikulta ba agrikultór sira.
“Kada tinan-tinan ami hahú hala’i natar iha marsu, tanba ne’e ami husu ba empreza tenke halo hotu ona sira-nia serbisu hodi kanaliza bee baá natar atu ami agrikultór sira bele halai ami-nia natar”, nia sujere.
Responde kestaun ne’e, Diretóra Empreza Saerubu Unip Lda, Maria da Silva Fernandes, afirma nia parte promete sei aselera projetu reabilitasaun ba irrigasaun Belia 1 no 2, nune’e finaliza iha fulan ne’e atu fasilita komunidade halai natar.
“Ami responsabiliza ho esforsu tomak hodi aselera serbisu reabilitasaun ba kanál irrigasaun ne’e. Agora ami hein hela karta extensaun projetu reabilitasaun nian ne’ebé maka ha’u foin lalais submete ba munisípiu Viqueque. Bainhira karta extensaun sai mak ami hahú fali serbisu tanba ami hakarak tenke hotu iha fevereiru ne’e atu abitante sira bele halai sira-nia natar”, Diretór ne’e kompromete.
Relatóriu husi Diresaun Programa Dezenvolvimentu (PDIM) Munisipál Viqueque kona-ba progresu ba projetu reabilitasaun ba irrigasaun Belia 1, 2 atinje ona 35%.
Projetu ne’e finansia hosi Programa Dezenvolviemntu Nasaun Unida (UNDP,sigla Inglés) ho totál kustu ba reabilitasaun irrigasaun Belia 1,2 hamutuk $74.948,96, ho distánsia ba irrigasaun kilométru 1.577 no irrigasaun Belia 1,2 fornese bee ba natar ektare 442.
Jornalista: Vitorino Lopes da Costa
Editór : Florencio Miranda Ximenes
