VIQUEQUE, 23 fevereiru 2024 (TATOLI)-Autoridade munisípiu Viqueque, sesta ne’e, re-establese liña koordenasaun Planu Munisípiu Ordenamentu Territoriál (PMOT) atu halo ordenamentu munisipál hodibele utiliza espasu ho di’ak ba dezenvolvimentu.
Tuir Sekretáriu Munisípiu Viqueque, Teotonio Sarmento da Silva, esplika, re-estabelesimentu elaborasaun PMOT liu husi liña koordenasaun, antes ne’e tama ona formatu iha Governo anteriór.
“Kona-ba planu servisu grupu traballu PMOT nian trasa tiha ona, iha ita-nia Governu anteriór atu halo kontratór ba peritu sira husi estranjeiru hodi prienxe kondisaun minimu ka dadus munisipál PMOT nian”,Sekretáriu munisípiu Viqueque, Teotonio Sarmento da Silva hatete ba Agência Tatoli, resintu munisípiu Viqueque, ohin.
Autoridade ne’e reafirma katak, PMOT ida ne’e importante tebes tanba ne’e presiza liña ministeriál sira hamutuk hodi tau hanoin ba ordenamentu iha munisípiu Viqueque.
“Ita hotu nia hamutuk hodi fó apoiu no tau idea hamutuk iha planu ida-ne’e hodi hadi’ak ita nia munisípiu nomós hadiak kualidade moris ita-nia komunidade sira liu-liu kona-ba ordena no utiliza espasu ho diak ba dezenvolvimentu Ita nia munisipál rasik”, katak nian.
Kona-ba prosesu elaborasaun ida-ne’e tama ona faze ezbosu finál, no sei iha konsultasaun públiku.
Jornalista : Vitorino Lopes da Costa
Editór : Florencio Miranda Ximenes
