PN enkoraja profisionál saúde kontinua fó atendimentu di’ak ba povu
DILI, 05 fevereiru 2024 (TATOLI)–Parlamentu Nasionál (PN) liuhusi Prezidente Komisaun F trata asuntu Saúde, Seguransa Sosiál no Igualidade, Deputada Maria Gorumali Barreto, husu profisionál saúde iha territóriu atu kontinua nafatin serbisu hodi fó atendimentu di’ak ba povu.
Notísia Relevante: Profisionál Saúde 2.256 kontratu konklui no MS foin rekruta no sei simu 229
“Ba profisionál saúde sira atu hala’o nafatin serbisu ho atendimentu profisionál hodi salva ita-nia povu,” Prezidente komisaun F ne’e hato’o liuhosi intervensaun iha reuniaun plenária PN, segunda ne’e.
Deputada hosi bankada Governu ne’e hateten, relasiona kontratadu profisionál saúde balun ne’ebé ninina kontratu ramata, Ministériu Saúde (MS) la extende sira-nia kontratu tanba pesoál sira-ne’e uluk Governu anteriór kontrata iha tempu fundu COVID-19 nian.
Nia dehan, tanba saúde família mós agora laiha ona entaun labele ezije nafatin, maibé MS rasik agora loké vaga hodi rekruta pesoál saúde foun ne’ebé ninia prosesu daudaun konklui ona hodi destaka ba fasilidade saúde sira.
Prezidente komisaun F ne’e mós hakarak hato’o katak, problema aimoruk stock out ne’ebé Timor-Leste hasoru ne’e, ida ne’e mai kedas hosi Governu anteriór no daudaun ne’e MS esforsu atu rezolve.
Deputadu FRETILIN, José da Crus ho Deputadu KHUNTO, Luis Roberto, husu MS kona-ba rekrumentu ne’ebé foin lalais hala’o ba pesoál saúde ne’ebé admitu atu bele destaka ona ba iha sentru saúde sira atu bele halo atendimentu ba povu.
Vise Ministru asuntu Parlamentár, Adérito Hugo da Costa, hateten IX Governu Konstitusionál iha loron 120 liuhosi MS halo avaliasaun ne’ebé iha ba pesoál saúde kontratadu balun ne’ebé nia kontratu ramata mak imediatu loké fila-fali rekrutamentu vaga hamutuk na’in 1700-resin kompostu hosi médiku, enfermériu, parteira no komesa destaka daudaun no faze daruak sei rekruta tan hodi kompleta to’o nível suku sira.
Notísia Relevante: Profisionál saúde 229 tama no serbisu ona iha HNGV
Jornalista : Nelson de Sousa
Editór : Cancio Ximenes
