DILI, 06 fevereiru 2024 (TATOLI)—Deputadu CNRT, Leandro Lobato, husu ba komandu Polísia Nasionál Timor-Leste (PNTL) atu koodena ho Konsellu Kombatente Libertasaun Nasionál (CCLN, siglá portugés) ba rekrumentamentu membru PNTL foun.
Notísia Relevante: Komandu PNTL rekruta membru foun polísia 200 iha marsu
“Iha tempu sira mai iha rekrutamentu ba polísia, tanba ne’e antesipadamente husu ekipa júri sira di’ak liu mós koopera ho Konsellu Kombante Libertasaun Nasionál, nune’e bele fó rekomendasaun ruma liga ho ita ninia ema sira-ne’ebé atu ba konkorre iha rekrutamentu ne’e,” Nia hato’o liuhusi reuniaun plenária PN, tersa ne’e.
Deputadu hosi bankada Governu ne’e husu rekrutamentu ne’e di’ak-liu ho koordenasaun ho parte relevante atu labele mosu situasaun sira-ne’ebé ema barak la espera no la hakarak. lakoi.
Antes ne’e, Membru komisaun B trata asuntu Negósiu Estranjeiru no Defeza ho Seguransa iha PN, Deputadu David Dias Ximenes, konsidera rekrutamentu foun ba membru PNTL iha tinan ne’e pertinente tebes.
“Rekrutamentu PNTL ne’e pertinente tebes, tanba kuandu komisaun B ba halo fiskalizasaun iha fronteira postu ida ne’e dalaruma iha ema ida (1) de’it ka na’in-lima (5), ne’e sala tanba atu komanda ema ne’e tenke seksaun ida tanba seksaun ne’e presiza iha ema na’in 12,” nia hateten ba jornalista sira iha uma fukun PN.
Tanba ne’e, nia husu presiza rekrumentu membru foun hodi koloka iha liña fronteira hodi reforsa asegura seguransa.
“Entaun iha ne’e ami ejize halo duni rekrutamentu ba postu sira la prienxe kriteira ne’e, pertinente tenke rekrutamentu membru foun,” nia hateten.
Deputadu hosi membru komisaun B ne’e hateten, rekrutamentu ne’e tenke haree ema ho didi’ak, tanba PNTL ne’e ho misaun hodi garante orden seguransa trankuilidade públiku no proteje ema ho ema nia sasán.
Aleinde ne’e, atu prevene ema hosi kriminalidade atu kontribui asegura funsionamentu instituisaun demokrátiku no garante direitu liberdade no respeitu ba legalidade demokrátika polisia ninian.
Atu hala’o ida-ne’e, iha pontu tolu mak dahuluk bolu vizibilidade iha ne’ebé de’it iha polísia nia prezensa permanente no povu ne’e serbisu hamutuk nune’e seguransa garantidu no ho polísia nu’udar ajente seguransa la’ós atu hela iha markas laran, nune’e nia aproximasaun makaas ba sidadaun sira tanba hanesan ajente seguransa.
Durante ne’e, nia dehan, komisaun B observa katak vizibilidade polísia sei menus tanba iha kalan hosi tuku 08h00 to’o 10h00 inklui loron sábadu ho domingu ne’e sira laiha ona, halo ema barak kestiona maibé sira hato’o katak membru la to’o, nune’e espera ho rekrutamentu ne’e bele prienxe.
Komandu PNTL fó sai ona, nia parte hato’o ona proposta ba Ministériu Interiór (MI) atu iha tinan ne’e halo rekrumentu ba membru PNTL foun hamutuk 200-resin.
Daudaun ne’e, membru Polísia Nasionál Timor-Leste (PNTL) iha territóriu nasionál ne’e hamutuk ema na’in-4337.
Jornalista : Nelson de Sousa
Editór : Cancio Ximenes
