DILI, 13 fevereiru 2024 (TATOLI) – Grupu akikultór 21 hetan fundu $49.308 husi Ministériu Agrikultura, Pekuária, Peska no Floresta (MAPPF) hodi haki’ak ikan, nune’e bele hasa’e produsaun ikan no sustenta nesesidade família nian.
Diretór Nasionál Akikultura, Fidelino Sousa Marques, hatete benfisiáriu 336 kompostu husi feto 124 no mane 212 ne’ebé mai husi munisípiu hotu.
“Osan ne’ebé ita apoia ona ba grupu 21 mai husi orsamentu 2023 nian ne’ebé ita prevee ho totál rihun $90. Husi montante osan ne’ebé ita prevee ne’e gasta de’it rihun $49.308, ekivalente ba 60%, hodi apoia ba grupu sira ne’e, maibé metade osan 40% maka la konsege gasta hotu ne’ebé filafali ba kofre Estadu”, dirijente dehan ba Tatoli iha Comoro, ohin.
Diretór ne’e informa katak, iha 2024, kontinua prevee osan liuhusi transferénsia públika hamutuk rihun $100. Diresaun sei foti 40% hodi kontinua apoia grupu haki’ak ikan sira ne’ebé eziste hodi bele kontinua sira-nian atividade, maibé nia kritériu mak kada grupu tenke submete uluk sira-nian relatóriu ezekuzasaun husi orsamentu 60% ne’ebé disponibiliza ona ba sira, depois maka ekipa husi diresaun bá halo verifikasaun no bainhira loos ona maka foin apoia tan osan faze daruak ba grupu sira ne’e.
Kada grupu nia montante osan ne’ebé diresaun apoiu lahanesan tanba bazeia ba medida husi fatin haki’ak ikan ne’ebé grupu sira prepara ona. “Balun natoon de’it, balun boot no balun ki’ik hela. Ne’ebé molok atu apoia osan sira ne’e, ekipa sei halo uluk verifikasaun bá fatin sira ne’e atubele kalkula kustu ba kada grupu ne’e hira bazeia ba kondisaun sira”, dehan.
Ba ikan sira ne’ebé grupu sira haki’ak ne’e disponibiliza husi diresaun, depende ba proposta ne’ebé kada grupu sira submete. Ezemplu, ikan mas no nila maka diresaun apoiu ona kada kabesa hamutuk 100, maibé husi apoiu sira ne’e maka to’o agora diresaun sei hein hela relatóriu atubele hatene ikan-oan ne’ebé sira hetan ne’e nia rezultadu oinsá, molok sira atu hetan tan apoiu tuirmai.
Xefe grupu Moris Foun, Jacinto Martins Marçal, informa katak tinan kotuk sira hetan fundu rihun $7 no ikan-oan hamutuk rihun 3 hodi haki’ak. Rezultadu husi ikan ne’ebé sira simu ne’e konsege kolleta ka fa’an, iha dezembru, hamutuk 200 no kada kilo fa’an ba $4.
Jacinto Marçal salienta kata sira haki’ak ikan iha suku Tirilolo, aldeia Etevata, iha postu Iliomar, munisípiu Lautém. Sira iha membru na’in-19, kompostu husi feto 11 no mane ualu. Ba atividade ida ne’e, sira submete ona relatóriu atu hein tan apoiu faze daruak nian.
Grupu akuakultura 21 ne’e mai husi Liquiçá rua, Aileu ida, Lautém tolu, Ainaro ida, Baucau rua, Viqueque ida, Manufahi ida, Manatuto rua, Bobonaro haat, Covalima rua no Ermera rua.
Notísia relevante: CJRO simu ona proposta 45 hosi grupu juventude
Jornalista: Tomé Amado
Editora: Maria Auxiliadora
