Profesór kontratadu 151 iha Oé-Cusse husu direitu atu tama ba ingresu espesiál
OÉ-CUSSE, 16 fevereiru 2024 (TATOLI) – Profesór kontratadu hamutuk na’in-151 iha Rejiaun Administrativa Espesiál Oé-Cusse Ambeno (RAEOA), husu ba servisu Eduksaun Oé-Cusse no Ministériu Edukasaun atu konsidera sira-nia direitu atu tama ingresu espesiál rejime karreira dosente tanba kontratadu tinan naruk ona nu’udar profesór.
Notísia relevante: Profesór kontratadu Oé-Cusse lamenta kondutór no cleaner balu naran sai iha ingresu espesiál
Portavós profesór kontratadu Oé-Cusse, João Bernardo Sila, informa, bazea ba Konstitusaun RDTL ártigo 5 no no lei 3/2014 8 de juñu, ne’ebé atribui podér lejítimu RAEPA hodi rekruta bazea ba nesesidade edukasaun nian.
Nia dehan, sé lei ne’e mak altura ne’ebá legál iha Timor-Leste, signifika rekrutamentu ne’ebé halo hosi Autoridade RAEOA mós legál, no tuir prosesu garantidu extraordináriu bazea ba estatutu RAEOA nian, ne’ebe fó benefísiu ba futuru oin mai.
Hafoin profesór sira hetan kontratu ho termu sertu hatuur iha dekretu-lei númeru 31/2023, loron 31 maiu, primeira alterasaun dekretu-lei númeru 23/2010, 09 dezembru, prevista iha artigu 11 hateten, ingresu espesiál aplika ba kontratu sira maibé latuir akordu durasaun kontratu.
Nune’e maske profesór kontratadu termu sertu iha artigu refere, loke hela dalan ba profesór kontratadu hirak-ne’e atu tama ba ingresu espesiál rejime karreira dosente.
“Tanba ami profesór kontratadu prienxe ona kritéria ne’ebé fó sai hosi Mininstériu Edukasaun katak, profesór sira-ne’ebé hetan ona autorizasaun avaliasaun dezempeñu hahú hosi 2021 to’o 2022, sira iha direitu atu tama ba ingresu espesiál ka rejime karreira dosente,” João Bernardo Sila.
Nia informa, bazea deklarasaun Ministra Edukasaun fó sai katak, lei númeru 31/2023, profesór kontratadu ne’ebé prienxe rekizitu mak hanesan abilitasaun literária mínimu baxarelatu no lisensiadu, hetan termu kontratu renova kada tinan hahú hosi 2014, 2019, 2021 no 2022, iha karta kolokasaun hosi edukasaun Oé-Cusse iha eskola sira ne’ebé maka menus nesesidade.
“Ami iha ona avaliasaun dezempeñu tinan 2021 no 2022 nian, ami-nia naran rejistadu iha sistema Komisaun Funsaun Públika nasional,” nia fó sai.
Tan ne’e nu’udar profesór kontratadu, ne’ebé hetan kontratu hosi Ministériu Edukasaun, hahú hosi 2019, 2021, 2022 inklui kontratu 2014, maka seidauk tama ingressu espesiál.
Nune’e profesór kontratadu sira lamenta tebes ho servisu edukasaun Oé-Cusse ne’ebe halo diskriminasaun ba profesór kontratadu sira ho durasaun servisu tinan lima (5) resin ona, maibé naran la tama iha lista ingresu espesiál.
“Ami profesór kontratadu sira deskonfia prosesu naran sira-ne’ebé agora daudaun iha ona Kamisaun Funsaun Publiku nasional, maibé hosi Edukasaun RAEOA la halo karta akompañamentu hodi aneksa hamutuk ho lista naran profesór kontratadu sira, hodi haruka ba FP nasional ho Ministériu Edukasaun atu nune’e ami profesór kontratadu sira iha direitu atu tama iha ingresu espesiál,” nia informa.
Notísia relevante:Profesór kontratadu 259 hosi Oé-Cusse elejivel ba ingresu espesiál
Tanba ne’e, profesór kontratadu hosi 2019, 2021, 2022, inklui 2014 hamutuk na’in-151 husu servisu Edukasaun RAEOA persiza aselera karta akompañamentu ba Komisaun Funsaun Públika, ho Ministériu Edukasaun nune’e rezolve imediatamente iha tempu badak nia laran.
“Sei laiha solusaun, ba oin profesór kontratadu sira sei ezije nafatin, hala’o demonstrasaun pasífiku hodi hetan rezultudu pozitivu,” nia promete.
Nia informa, profesór kontratadu sira hahú hosi 2019, 2021 no 2022 inklui 2014, la konkorda atu konkore bolsu kandidatu, ho razaun prienxe ona rekizitu, ne’ebe anunsiu tiha ona iha públiku husi Ministra Edukasaun.
“Nasaun ida laiha profesór, hanesan ai ida laiha abut, maibé ita hatene katak sira iha vokasaun hari’i na’in ba rai, no luta na’in ba rai,” nia katak.
Hatán ba preokupasaun ne’e, Sekretária Rejionál Asuntu Edukasaun no Solidariedade Sosiál, Inácia Tamele, rekoñese asuntu kontratadu sira, no promete sei servisu maka’as atu fó solusaun.
“Sira-nia karta iha ha’u-nia liman ona, maibé ha’u sei konfirma ho Komisaun Funsaun Públika, resposta ida maka, sira tenke konkore iha bolsa kandidatura, depois sira-bele tama iha kontratu indeterminadu, maibé ida-ne’e sei prosesa,” nia fó hanoin.
Notísia relevante: Profesór kontratadu 4.019 sei tama iha ingresu espesiál
Jornalista: Abílio Elo Nini
Editór: Evaristo Soares Martins
