iklan

COVALIMA

PAAS Suai Loro kontinua serbisu ho voluntáriu 

PAAS Suai Loro kontinua serbisu ho voluntáriu 

Administradór postu Suai, Luzinho Rego, halo abertura ba desportu komunitária iha suku Suai Loro. Imajen Tatoli/ Celestina Teles.

COVALIMA, 23  fevereiru 2024 (TATOLI)  –  Pesoál Apoiu Administrativu Suku (PAAS) Suai Loro kontinua serbisu ho forma voluntáriu dezde janeiru hodi hein orsamentu subvensaun husi suku.

Xefe Suku Suai Loro, Manuel Gomes da Costa, hatete PAAS mantein serbisu bazeia ba rezultadu akordu husi konsellu suku ne’ebé promete ba sira katak sei fó insentivu liuhusi subvensaun suku.

“Ha’u la bolu fali PAAS foun, tanba anteriór ne’e iha ona esperiénsia, maibé agora servisu ho voluntáriu, tanba ami promete fulan tolu mak atu selu saláriu bainhira insentivu suku sai ona”, autoridade ne’e dehan, ohin.

Manuel Costa mós aprezenta ona kestaun ne’e ba Administradór Postu Suai, tanba hanesan xefe suku, mesak labele halo atendimentu ba komunidade iha suku Suai Loro ho nia aldeia lima ho nia luan área 2.785 no nia populasaun hamutuk 4.550, kompostu husi feto 2.294 no mane 2.256 ho totál xefe família 1.207. Tanba ne’e, autoridade suku ne’e tenke iha pesoál apoiu hodi halo atendimentu ba abitante sira.

Liuhusi orsamentu subvensaun suku ne’e xefe suku mós promete atu selu PAAS Suku Suai Loro kada fulan $120, tanba dadaun ne’e sira serbisu ho voluntáriu hahú husi segunda to’o kinta, tama 08h00 to’o 12h00 no lorokraik tama bainhira presiza.

Administradór Postu Suai, Idelfonso Maria Amaral, hatete depois simu pose nia parte seidauk simu informasaun ruma husi xefe suku sira kona-ba Pesoál Apoiu Suku ne’ebé kontinua hala’o serbisu ho voluntáriu.

Orsamentu Jerál Estadu 2024 ba Covalima hamutuk millaun $7,3, husi orsamentu ne’e aloka ba postu Suai $98,682.

Rekorde katak, Diretór Nasionál Apoiu Administrasaun Suku, Celestino Marques, fó sai ona katak kontratu ba PAAS iha suku 452 nia kontratu termina ona iha 31 dezembru.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!