OÉ-CUSSE, 01 marsu 2024 (TATOLI) – Durante tinan 2023, Kooperativa Kafé Lakufoan, iha Rejiaun Administrativa Espesiál Oé-Cusse Ambeno (RAEOA), rekolla $2.104 liuhosi fa’an kafé, ho fundu reimbolsa $7.129.
Notísia relevante: Grupu Kafé Lakufoan Oé-Cusse hetan rendimentu di’ak iha feira produtu lokál
Prezidente Kooperativa Kafé Lakufoan, Marcelino Neno, relata sai relatóriu ne’e, iha ámbitu vizita ofisiál hosi Ministru Komérsiu no Indústria (MCI, sigla portugés), Nino Pereira, iha Kooperativa Lakufoan Oé-Cusse, sesta ne’e.
“Ami hetan ekipamentu mai hosi UNDP, mákina dulas kafé mutin no mean, kafé rahun, no ekipamentu seluk, tán ne’e ho vizita hosi ministru, ami sente kontente tanba ba futuru bele buka dalan mai ami oinsá asesu ba merkadu ho ami-nia produtu kafé,” Marcelino Neno, informa iha enkontru ho Ministru MCI, Nino Pereira.
Kooperativa Kafé Lakufoan, harii iha 2017 hetan apoia hosi UNDP, komesa hosi ne’e prosesamentu fa’an komesa la’o, no daudaun ne’e iha membru ativu hamutuk na’in-39 ho to’os kafé ektare 58, la inklui naun-membru sira.
Nia realsa, durante ne’e agrikultór sira-ne’ebé mai tetu kafé musan mean iha Kooperativa Kafé Lakufoan hamutuk kilograma 7.698, daudaun sona ona kilograma 7.415, no fa’an ona kafé rahun hamutuk kilograma 1.237.
“Totál osan ne’ebé hetan iha 2023 hamutuk $2.104, iha-ne’e mós la’ós atividade kafé de’it, maibé iha mós atividade rai no smpresta osan, no totál osan ne’ebé rai ona iha kooperativa ne’e hamutuk $7.129,” Marcelino Neno katak.
Nia fundamentu, osan ne’ebé rekolla, mai hosi fa’an iha loza sira iha Oé-Cusse no mós iha kapitál Díli, inklui fa’an iha merkadu tradisionál sira.
Tán ne’e rezultadu ne’ebé Kooperativa Kafé Lakufoan hetan, tanba hetan apoia másimu hosi UNDP hodi apoia kona-bá kapasitasaun no formasaun ba rekursu umanu, apoia tékniku inovasaun foun, apoia pestisida orgániku no apoia mós kafé oan.
“Tán ne’e ho prezensa visita ofisiál ne’e, ami espera bele tulun ami, liuliu atu asesu ba merkadu, hodi buka osan atu sustenta ami-nia kooperativa liuhosi ami-nia produtu kafé ne’e,” nia rekomenda.
Notísia relevante: Grupu agrikultór Pante Makasar prepara kuda kafé rihun 23-resin iha époka 2022
Hafoin relata rezultadu ne’e, Ministru Komérsiu no Indústria, Nino Pereira, apresia tanba produsaun ba kafé, hahú eziste to’o ohin loron, iha parseria di’ak ho Ajénsia Internasionál UNDP no halo mós akompañamentu iha tinan barak nia laran, hosi parte Diresaun Komérsiu Indústria RAEOA.
Nune’e mós Diresaun Kooperativa Oé-Cusse, servisu hamutuk atu halo akompañamentu intensivamente ba grupu produtiva Kooperativa Kafé Lakufoan.
“Hosi atividade indústria produsaun kafé ne’e, sira konsege duni tama iha merkadu lokál, inklui mós ba iha nasionál tanba iha loza boot balun simu mós produtu kafé Lakufoan, kafé uut, kafé orgániku 100% ho marka kafé arabika,” nia orgullu.
“Ida-ne’e importante bele fó asesu ba merkadu, MCI mós hanoin katak, presiza liután organiza atividade enkontru negósiu entre empreza ki’ik sira iha Oé-Cusse, atubele asesu ba iha merkadu hodi hasa’e tán kualidade sira-nia produtu, sira mós bele iha informasaun kona-bá oinsá bele asesu iha finanseiru,” nia promete.
Notísia relevante: Autoridade RAEOA sei promove produtu lokál lima iha aniversáriu sidade Kefamenanu
Entretantu, Kooperativa Kafé Lakufoan, lokaliza iha aldeia Lakufoan, suku Costa, sub-rejiaun Pante Mkaasar.
Jornalista: Ablio Elo Nini
Editór: Evaristo Soares Martins
