DILI, 07 marsu 2024 (TATOLI)—Sekretáriu Estadu Komunikasaun Sosiál (SEKOMS), Expedito Dias Ximenes, kinta ne’e, halo sorumutu ho Prezidente Autoridade Munisípiu Dili (PAMD), Gregório Saldanha, hodi dsikute kona-ba melloramentu servisu jestaun lixu iha kapitál Dili.
Notísia Relevante: Gregório Saldanha simu pose husi MAE, Prioriza área 12 durante mandatu
“Ohin, ha’u mai enkontru ho Prezidente Autoridade Munisípiu Dili, atu ko’alia kona-ba apoiu mídia nian ba iha atividade programa polítika prezidente autoridade nian liuliu liga servisu jestaun lixu iha kapitál Dili,” Sekretáriu Estadu Komunikasaun Sosiál (SEKOMS), Expedito Dias Ximenes, hateten ba jornalista sira, iha salaun AMD, kinta ne’e.
Tanba, nia dehan, Dili hanesan kapitál nasaun nian ne’ebé presiza ambiente saudavél no sai sidade moos, entaun presiza meu komunikasaun sosiál ka mídia sira hodi hala’o sira-nia papél importante hodi apoia Prezidente Autoridade Munisípiu Dili nia poítika ba oin.
Prezidente Autoridade Munisípiu Dili (AMD), Gregório Saldanha, hateten enkontru ho SEKOMS ohin ne’e atu halo melloramentu servisu jestaun lixu nian iha kapitál Dili ne’e.
“Ohin SEKOMS mai enkontru ho ha’u ne’e ho intensaun atu iha publikasaun informasaun ba atividade PAMD nian hodi kontribui ba servisu PAMD ho Governu hamutuk hodi jere sidade Dili. Ida-ne’e ami agradese no kontente tebes tanba servisu ida la izola, no públika antesipadamente atu ba halo saida, ne’e públiku presiza hatene,” nia dehan.
Notísia Relevante: Iha konteúdu Sirkulár munisipál husu ema hotu responsabiliza lixu, la’e sansaun
Tanba, tuir nia, Dili hanesan odamatan no lalenok ba Timor-Leste nian, une’e tenke halo jestaun ida-ne’ebé di’ak tanba kompleksidade barak-barak, mentalidade no interrese oioin inklui ekonomia, polítika no sosiál mós.
“Tanba ne’e, ita tenke servisu hamutuk ho entidade hotu-hotu, nune’e halo sidade Dili sai matak, furak no moos,” nia hateten.
SEKOMS ohin mai ho asuntu mídia nian ba publikasaun ligadu ba Sekretáriu Estadu Toponímia no Oganizasaun Urbana nian ne’ebé ba hamoos fatin hanesan iha Bidau Sengol nian ne’e, molok hasai komunidade iha fatin ida-ne’e tenke informa uluk katak loron hanesan ne’e sei ba hasai no hamoos fatin no tenke halo preparasaun ne’ebé di’ak.
“Ita hasai komunidade ho dignu no ho dignidade, maibé tenke respeitu no hakruuk ba lei sira tanba interrese públiku iha ema hotu nia leten. Estadu tenke deside no mídia tenke fó sai informasaun ne’ebé loloos, nune’e ema labele sente ida-ne’e hanesan surpreza ida,” nia dehan.
Ko’alia kona-ba lixu, nia dehan, lixu prioridade mak problema ne’ebé tenke haree mak kamioneta sira-ne’ebe mak rekolla lixu, tanba lixu kle’ur nian seidauk rekolla hotu depois lixu foun butuk tan deít iha lixu tuan nia leten.
“Ministru fó ona orden katak aumenta tan kamioneta 50 hodi reforsa no aselera tan kamioneta antes rekolla lixu ne’e, no ami koordena ona ho kompañia ne’ebé mak hatama ekipamentu mai ne’e atu instala,” nia hateten.
Notísia Relevante: Reprezentante povu iha esperansa PAM Dili rezolve problema lixu
Jornalista : Osória Marques
Editór : Cancio Ximenes
