FMDC no parseiru lansa kompetisaun reportajen sensível jéneru
DILI, 08 marsu 2024 (TATOLI)—Fundasaun Media Development Center (FMDC) hamutuk ho nia parseiru hanesan Konsellu Impresa (CI, sigla portugés) Timor-Leste no Un Women, sesta ne’e, halo lansamentu ba kompetisaun reportajen sensível jéneru.
Diretór FMDC, Francisco da Silva Gari, hateten, objetivu atividade ne’e atu enkoraja jornalista sira prodús notísia ne’ebé sensível ba jéneru iha kada mídia hodi tau importánsia ba feto no asuntu igualdade jéneru.
“Atu enkoraja jornalista sira nomós organizasaun mídia atu halo produsaun ba notísia ne’ebé ho kontíudu sensível ba jéneru, bainhira halo kobertura asuntu feto labarik, kanaliza fahe esperénsia hosi alin feto sira, grupu marjinalijadu, oinsá kobertura ne’ebé mak iha resposabilidade, kualidade no hakarak promove serbisu jornalizmu ne’ebé inkluzaun, kontribui ba pás no estabilidade nian,” Francisco da Silva Gari, hateten, iha salaun FMDC, Hudi-laran.
Notísia relevante : UNTL no IPDC sai vensedór kompetisaun hakerek sientífiku-diskursu lian portugés
Iha fatin hanesan, Prezidente CI, Otélio Ote, konsidera atividade ne’e importante tebes tanba bele influénsia jornalista sira bele kobertura iha área liga ho igualdade jéneru, feto, labarik no seluk tan.
“Ha’u husu ba jornalista sira, hahú ohin ba oin bele halo reportajen sensível jéneru bazeia ba faktu no haree mós mata-dalan sira ne’ebé iha tanba mídia nia papél ne’e importante tebes,” Otélio Ote, fó hanoin.
Analiza programa hosi EVAW, UN Women, Teresa Verdial de Araujo, hateten, liga ba asuntu reportajen sensível jéneru, mídia kaer papél importante atu kontribui ba igualdade jéneru, violénsia hasoru feto no labarik feto inklui ema ho defisiénsia.
“Ita liga ba loron internasionál feto nian ohin mak ‘investe iha feto aselera progresu’, ida-ne’e ita hakarak tau asaun reál liuhosi ita-nia papél hanesan mídia, saida mak ita bele kontribui ba investimentu iha feto hodi aselera progresu, ho ida-ne’e mak mídia nia serbisu importante ba asuntu ne’e,” nia tenik.
Ekipa juri sei halo avaliasaun notísia ba kompetisaun reportajen sensível jéneru, hahú hosi loron publikasaun iha 08 marsu to’o 30 abríl no rezultadu sei fó sai iha loron 03 maiu 2024, iha ámbitu loron liberdade imprensa.
Prémiu ba reportajen sensível jéneru ne’e mak manán dahuluk sei hetan osan ho montante $1.000 ho laptop ida, daruak osan $750 ho telemóvel ida no datoluk sei hetan osan $500 ho telemóvel ida.
Mídia ne’ebé sei hola parte iha kompetisaun ne’e mak hanesan Agência Tatoli, I.P, Suara Timor Lorosa’e (STL), Independente, Timor Post, Hatutan, no Neon Metin.
Ekipa juri ba kompetisaun ne’e maihosi CI, UN Women, Asosiasaun Jornalista Timor-Leste (AJTL), Asesór hosi Sekretaria Estadu Komunikasaun Sosiál (SEKOMS) inklui Dosente Komunikasaun Sosiál hosi Universidade Nasional Timor-Lorosa’e (UNTL).
Jornalista : Arminda Fonseca
Editora : Julia Chatarina
