DILI, 12 marsu 2024 (TATOLI)—Xefe Bankada CNRT, Deputadu Duarte Nunes, hateten bankada CNRT ho FRETILIN komunika ba malu hodi ko’alia kona-ba eleisaun kandidatu Komisáriu Komisaun Anti-Korrupsaun (CAC, siglá protugés), maibé parte FRETILIN husu atu fó oportunidade ba sira atu hala’o reuniaun interna iha bankada hafoin mak hola desizaun ikus.
Notísia Relevante: Parlamentu Nasionál adia eleisaun komisáriu CAC
“Asuntu ne’e liuliu bankada rua (CNRT ho FRETILIN), ami ko’alia ona mais bankada FRETILIN nian fó oportunidade ba sira. Ohin, sira iha reuniaun bankada nian depois sei fó informasaun ba Prezidente Parlamentu atu ajenda ka lae ba semana oin,” Xefe Bankada CNRT, Duarte Nunes, hateten ba jornalista sira iha PN, tersa ne’e.
Tanba ne’e, parte bankada FRETILIN husu atu tempu ohin tersa ne’e sira hala’o reuniaun bankada hafoin mak hola desizaun.
La’ós seidauk iha konsensu entre bankada boot rua ne’e, maibé parte bankada FRETILIN husu fó oportunidade ba sira atu halo reuniaun iha sira-nia bankada hodi konsolida didi’ak antes fó desizaun.
“Hanoin atu halo konsensu ne’e mak sira tenke konsolida hotu antes ba reuniaun (ajenda eleisaun), tanba kuandu sai iha ne’eba rezultadu ne’e dehan rezultadu konsensu,” nia hateten.
Husu kona-ba karik bankada FRETILIN mak hakarak dada hodi lakohi aseita kandidatu komisáriu CAC, maibé Deputadu Duarte lakohi responde to’o iha ne’eba.
“La responde to’o ne’eba, ha’u ko’alia buat ne’ebé rona no hateten buat ne’ebé loos,” nia dehan.
Aefe bankada CNRT ne’ e lakohi hatan kestaun eleisaun ba komisáriu CAC ne’e adia beibeik hahú hosi tinan kotuk tanba laiha konsensu entre bankada parlamentár, karik presiza altera lei CAC hodi la presiza Deputadu na’in 48 prezente bele prenxe kórum ba eleisaun komisáriu CAC.
‘’Di’ak liu husik ba Parlamentu ko’alia ba malu entende malu. Prontu komisáriu ne’ebé mai bele hotu-hotu simu nia rezultadu serbisu sira halo, duke ita dun ba malu ne’e sira-nina no ne’e ami nian, sira laiha benefísiu ba ita-nia rai,” nia hateten.
Karik bankada opozisaun la aseita nafatin kandidatu ne’e, hanoin ne’e situasaun obriga Governu buka dalan seluk karik hanoin nafatin atu CAC ne’e eziste, la halo serbisu bele fila-fali ba Ministériu Públiku bele mós akontese.
Entertantu, jornalista Ajénsia TATOLI, ohin, tenta komunika ho mídia bankada FRETILIN iha PN hodi bele halo entervista ho Xefe Bankada FRETILIN, Deputadu Aniceto Longuinhos Guterres, maibé la disponivel atu hala’o entervista ho mídia tanba sei okupadu hela.
Antes ne’e, iha 03 marsu 2024, Prezidente Parlamentu Nasionál (PN), Maria Fernanda Lay, hateten ohin meza adia ajenda eleisaun Komisáriu Komisaun Anti-Korrupsaun (CAC, siglá portugés).
“Ohin, ha’u temi iha plenária, ha’u altera tiha ajenda (eleisaun komisáriu CAC) tanba razaun téknika kórum la to’o. Ne’ebé hanoin kórum ¾ mantein ne’ebé Deputadu 48 tenke mantein iha. Se laiha, labele tau ba votasaun, laiha kórum ne’ebé lei ezije,” Prezidente PN ne’e hateten ba jornalista sira iha PN, tersa ne’e.
Nune’e la prienxe kórum mak meza deside kansela ajenda ba eleisaun komisáriu CAC no semana oin sei tau fali ba ajenda.
Kona-ba konsensu eleisaun komisáriu CAC, Prezidente PN ne’e, hateten ida-ne’e xefe bankada sira tanba sira mak halo negosiasaun, no nia-parte halo intervensaun nesesáriu ka lae no bankada mak tenke halo negosiasaun.
Antes ne’e, Primeira Sekretária Meza PN, Deputada, Maria Teresa Gusmão, hateten iha reuniaun líder bankada iha 29 fevereiru 2024 deside ajenda ona ba reuniaun plenária iha loron 05 fulan marsu hala’o eleisaun komisáriu CAC.
Antes ne’e, Segundu Sekretária Meza Parlamentu Nasionál (PN), Deputada Bendita Monis Magno, hateten Governu haruka ona, naran Rui Pereira dos Santos, nu’udar kandidatu lista úniku ba komisáriu CAC.
Tuir lejislasaun ne’ebé vigora, naran sira-ne’ebé propoin hosi Governu sei analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus ¾ hosi Deputadu ho funsaun efetiva.
Jornalista : Nelson de Sousa
Editór : Cancio Ximenes
