DILI, 12 marsu 2024 (TATOLI)— Fasilita públiku bele asesu informasaun instituisaun nian, Governu liuhusi Ministériu Administrasaun Estatál (MAE), planea atu estabelese no lansa balkaun úniku MAE.
“Iha fulan maiu tinan ne’e, ita sei halo lansamentu ba portal munisípiu no balkaun úniku MAE nian no resensiamentu biométriku mós sei iha maiu. Balkaun úniku ne’e rasik nia signifika sei hatama hotu relatóriu servisu instituisaun nian hodi fasilita ema bainhira hakarak atu hatene informasaun,” Ministru Tomas do Rosário Cabral, kompromete, bainhira halo abertura ba lansamentu projetu Sekretária Estadu Dezenvolvimentu 2024 iha salaun Laline-Larigu, CNE, Colmera, Dili, tersa ne’e.
Antes lansa balkaun úniku ne’e, nia parte husu autoridade idaidaik ho nia estrutura ne’ebé iha prepara aan konsulta ho membru Governu hosi MAE ne’ebé sei tuun direita ba servisu ho ho autorudade sira liuliu programa ida mak ohin lansa kona-ba projetu SEDL 2024 ne’e.
“Estudu sira ne’e sei hatama hotu ba iha balkaun úniku ne’e atu ema ruma hakarak halo estudu filafali ba estatutu nia la presiza mai halo entrevista ita maibé peskiza direita liuhosi ita-nia balkaun úniku, tanba ita iha tempu tinan tolu de’it atu implementa aktu ida ne’e, tanba ita la’ós ona deskonsentrasaun maibé ita halo ona delegasaun territoriál,” Governante ne’e hateten.
Ministru Administrasaun Estatál, Tomas Cabral parte mós husu Vise-Ministru MAE ho Sekretáriu Estadu Dezenvolvimentu Lokál atu haree estatutu Ataúro ba planemaentu Investimentu ne’e, tanba hafoin nomeia tiha autoridade loron 30 tenke aprezenta ba Konsellu Ministru planu estratéjiku Ataúro nian.
Entretantu, Orsamentu Jerál Estadu (OJE) 2024 alokadu ba MAE hamutuk $ 54.409.66, hodi implementa programa Desentralizasaun Administrativa no Poder Lokál ho kuantidade verba hamutuk 30.482.492 no mós programa Funsionamentu no Dezenvolvimentu Institusionál, ho kustu orsamentu hamutuk 20.842.366.
Jornalista : Arminda Fonseca
Editór : Rafael Ximenes de A. Belo
