DILI, 13 marsu 2024 (TATOLI)—Prezidente Parlamentu Nasionál, Maria Fernanda Lay, akompaña hosi Prezidente Komisaun G trata asuntu Edukasaun, Juventude Desportu no Kultura, Armado Lopes no membru komisaun, kuarta ne’e, simu audiénsia ho reprezentante eis profesór kontratadu sira hodi rona sira-nia preokupasaun.
Notísia Relevante: Deputadu PD-CNRT apresia ME rezolve profesór kontratadu 4000-resin ba permanente
“Hakarak agradese ba Prezidente Parlamentu Nasionál, Maria Fernanda Lay, tanba simu ami-nia karta audiénsia ne’ebé ami hato’o mai iha ne’e no ohin realiza enkontru,” Portavós profesór kontratadu, Agostinho Pinto, hateten ba jornalista sira hafoin ramata enkontru iha sala konferénsia PN.
Iha sorumutu ne’e, sira aprezenta razaun fundamentu ne’ebé nu’udar profesór kontratadu ho prosesu ne’e to’o ohin loron liuliu problema hasoru hamutuk ho Ministériu Edukasaun, tanba iha lei la permite sira atu ba iha bolsa rekrutamentu (kandidatu) (tanba ho diploma sekundáriu), tan ne’e ohin loron sira kontinua halo demostrasaun hodi ko’alia.
Liuhosi sorumutu ne’e, sira relata situasaun sira-ne’e ba Prezidente PN hodi rona di’ak no PPN mós hato’o ninia solidariedade no husu fó fulan ida ba nia atu buka solusaun diálogu ho Ministériu Edukasaun no Komisaun Funsaun Públika (KFP) no Prezidente mós husu atu hapara ona manifestasaun,
“Ne’ebé, ami mós rona ida-ne’e no sei fó fiar tomak ba iha Prezidente PN nu’udar mós reprezentante povu iha órgaun soberania ida-ne’e. Nu’udar sidadaun iha esperansa bele iha solusaun, tanba buat hotu ita tenke kumpre ba regra no lei ne’ebé iha,” nia hateten.
Relevante: 15 marsu: Aplikante bolsa rekrutamentu ba profesór sei tuir teste eskrita
Portavós ne’e mós aprezenta razaun labele konkorre ba bolsa rekrutamentu (kandidatu) ne’e, tanba se hatuur ona iha dekretu-lei ne’ebé iha rua de’it katak profesór kontratadu sira ida ba ingresu espesiál se karik nia la prienxe rekezitu ingresu espesiál tenke hetan fila-fali kontratu tempu indeterminadu ba profesór sira-ne’ebé la prienxe rekezitu hodi hala’o funsaun administrativa iha eskola.
Prezidente Komisaun G trata asuntu Edukasaun iha PN, Deputadu Armando Lopes, hateten ida-ne’e foin dahuluk audiénsia ho profesór kontratadu sira, nune’e sei enkamiña preokupasaun ba parte kompetente atu buka solusaun.
Nune’e, tuir nia, iha kinta-sesta (14-15 marsu) ne’e parte PN liuhosi komisaun G sei bolu Ministériu Edukasaun no Funsaun Públika hodi halo audiénsia.
Notísia Relevante: Aplikante bolsa rekrutamentu ba profesór 13.021 admitidu atu tuir teste eskrita
Jornalista : Nelson de Sousa
Editór : Cancio Ximenes
