DILI, 14 marsu 2024 (TATOLI) – Ministru Defeza (MD), Kontra Almirante, Donanciano Costa Gomes Pedro Klamar Fuik, hateten Governu Nova Zelandia kompromete fó apoiu nafatin ba Ministeriu Defeza hodi dezenvolve di’ak liután F-FDTL.
”Señora Embaixadora Nova Zelandia mai hasoru ha’u hodi kompromete katak Nova Zelandia disponivel nafatin atu hametin kooperasaun ne’ebé durante ne’e la’o ona ho instituisaun F-FDTL no Ministériu Defeza Timor-Leste” , Pedro Klamar Fuik, dehan ba jornalista sira hafoin halo tiha enkontru kortezia ho Embaixadora Nova Zelandia ba Timor-Leste, Hellen Tunnah, iha Ministériu Defeza Fatuhada, kinta ne’e.
Klamar Fuik haktuir, Embaixadora Nova Zelandia kompromete katak mantein apoia ba F-FDTL ho armamentu no treinamentu ba banda múzika nian oinsá F-FDTL bele sai forsa ne’ebé mak profisionál liután no kontinua kooperasaun espesializada asesoria mai Ministériu Defeza atu organiza institusaun no dezenvolve instituisaun ne’e ho di’ak liután.
“Nova Zelandia hakarak kontinua kontribui ba dezenvolvimentu F-FDTL nian. Ami sei haree hodi bele renova fila fali kooperasaun ne’ebé Ministeriu Defeza iha ho Nova Zelandia para ba future ita kontinua hametin kooperasaun sira ne’ebé iha ona ne’e”, nia adianta.
Tanba, Nova Zelandia nu’udar nasaun amigu ne’ebé di’ak tebes ba Timor-Leste desde Timor-Leste nian independénsia.
“Noza Zelandia kontinua suporta Ministériu Defeza, F-FDTL inklui institusaun sira seluk ba dezenvolvimetu institusionál”, nia afirma.
Iha fatin hanesan, Embaizadora Nova Zelandia ba Timor-Leste, Hellen Tunnah, hateten Nova Zelandia kompromete hodi kontinua hametin relasaun bilaterál ho Timor-Leste.
Nia dehan, Timor-Leste ho Nova Zelandia nia relasaun desde nasaun seidauk ukun aan, Nova Zelandia haruka nia kontijénsia ida hodi halo misaun pás ONU nian iha ne’e no kontinua relasaun ne’e to’o Timor-Leste nia ukun aan.
“Nova Zelandia kompromete hodi apoia nafatin Ministériu Defeza inklui forsa F-FDTL atu sai militár ne’ebé profisionál iha futuru”, Diplomata ne’e afirma.
Jornalista: Natalino Costa
Editór : Zezito Silva
