Autoridade apoia nesesidade bázika ba uma-kain 74 iha Naktuka
OÉ-CUSSE, 09 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi asesór trata asuntu sosiál, kuarta ne’e apoia nesesidade bázika hanesan foos, supermie, ikan-lata, susu-been, forre-munggu no hahán seluk-tán inklui ekipamentu peskadór ba kbiit laek uma-kain 74 iha bairru Naktuka, suku Bene-Ufe, sub-rejiaun Nítibe.
Notísia relevante: Autoridade observa komunidade suku rua iha sub-rejiaun Nítibe
Asesór ba Prezidente Autoridade RAEOA trata asuntu Sosiál, Agustinho Caet, informa, asaun sosiál ne’e hetan apoia dirieta hosi Ministériu Solidariedade Sosiál no Inkluzaun (MSSI) no Prezidente Repúblika, José Manuel Ramos Horta, ho objetivu atu kontribui atinje programa hamenus pobreza iha Oé-Cusse.
Agustinho Caet, informa, programa asaun ne’e sei kontinua distribui tán ba suku sira seluk, bazeia dadus no pedidu ne’ebé Autoridade RAEOA simu hosi autoridade lokál sira.
Tanba ne’e, nia fó hanoin ba benefisiáriu sira, nesesidade ne’ebé simu ona, labele fa’an tután, maibé uza ba konsumu uma laran nian.
“Ami mai atende imi-nia pedidu hosi bairru Naktuka, husu atubele apoia foos, lista tama ba Autoridade iha 74, no sasán sira-ne’e, ita hetan apoia hosi MSSI no balu hosi Prezidente Repúblika, José Ramos Horta oferese mai Autoridade RAEOA, ne’e maka liuhosi asesór asuntu sosiál, koordena ho autoridade lokál sira, maka ohin ita mai fahe sasán hirak-ne’e, ami entrega ba ita-boot sira atubele aguenta imi-nia vida moris atu haree imi-nia serbisu, no ida-ne’e la’ós atu fa’an maibé uza ba konsumu loro-loron,” Agostinho Caet, ko’alia iha ámbitu serimónia distribuisaun hala’o iha Naktuka.
Notísia relevante:Prezidente Repúblika apoia nesesidade bázika ba família 77 iha Oé-Cusse
Iha biban ne’e, Octaviano Falo no Berta Tolan, nu’udar benefisiáriu hosi bairru Naktuka, agradese ba Governu liuhosi Minitériu Solidariedade Sosiál no Inkluzaun hamutuk ho Autoridade RAEOA, bele apoia atu hakman sofrimentu nesesidade família.
“Ha’u orgullu tebes ba sosiál no autoridade mai fó apoia nesesidade bázika ba komunidade, hanesan foos karon ida, no nesesidade seluk-tán, manta no biti, tan ne’e ami agradese,” Octaviano Falo orgullu.
Berta Tolan, “Ha’u kontenti, tanba Governu hanoin ami fó apoia ai-han ba ami hanesan kbiit laek atu uza ba konsumu ba moris loro-loton nian,” nia katak.
Notísia relevante:PR Horta sei apoia nesesidade bázika ba feto 50 iha Oé-Cusse
Entretantu, tuir dadus durante ne’e Autoridade RAEOA liuhosi asesór trata asuntu sosiál, apoia ona benefisiáriu hamutuk 300-resin alvu ba família kbiit laek, no atividade ne’e sei iha kontinuasaun ba sira-seluk iha territóriu Oé-Cusse.
Jornalista: Abílio Elo Nini
Editór: Evaristo Soares Martins
