DILI, 15 abríl 2024 (TATOLI)—Deputadu husi bankada CNRT iha Parlamentu Nasionál (PN), Duarte Nunes, husu atu halo auditoria ba Institutu Nasionál Seguransa Sosiál (INSS).
“ Ha’u hanoin importante halo auditoria ba seguransa sosiál hodi ita hatene, ne’e osan Estadu nian mós iha no ema nian mós iha, entaun presiza informasaun ne’e períodiku nune’e nia na’in sira bele hatene,” Deputadu Duarte Nunes hato’o iha ámbitu halo apresiasaun no diskusaun relatóriu no paresér kona-ba ezekusaun orsamentál trimestre dahaat ba tinan finanseiru 2023, iha reuniaun plenária, segunda ne’e.
Deputadu husu Governu atubele halo auditoria urjente.
Iha biban hanesan, Deputada CNRT, Virgina Anabelo, preokupa iha relatóriu ezekusaun orsamentál 2023 tanba INSS la aprezenta relatóriu.
“Orsamentu ne’e povu ninian iha ne’ebá, maibé sira laiha relatóriu to’o agora, ne’ebé husu Governu, liu-liu Ministériu Finansa atubele fó informasaun ba ami liga ba situasaun sira ne’e hodi ita prevene situasaun ne’e iha futuru, lori fali relatóriu orsamentu trimestrál dahuluk 2024 labele komete tan, tanba ne’e susar tebes ba Parlamentu atu buka tuir osan sira ne’e,” nia dehan
Notísia relevante : Kontribuente kontribui ona millaun $115.9 ba Fundu Rezerva Seguransa Sosiál
Enkuantu, tuir relatóriu no paresér ba relatóriu ezekusaun orsamentu trimestre dahaat ba tinan finanseiru 2023, Komisaun C ne’ebé trata asuntu Finansa Públika iha PN, rekomenda pontu importante ida atu monitoriza no aprimorar jestaun finanseira, mak notifika INSS atu aprezenta relatóriu ezekusaun orsamentál seguransa sosiál, garante transparánsia no responsabilidade iha jestaun rekursu.
Ministra Finansa, Santina Cardoso, hateten, rekomendasaun sira husi Komisaun C kona-ba seguransa sosiál, ne’e hanoin loos duni katak parte Ministériu Finansa (MF) iha diresaun nasionál tezouru tenta nafatin atubele husu informasaun ne’ebé mak mai husi INSS atubele fornese relatóriu hodi bele fasilita ein termu halo nia monitorizasaun kontabilístiku no transparánsia no ba ema hotu ne’ebé kontribui ba seguransa sosiál atubele hatene loloos lala’ok ezekusaun no nia orsamentu iha seguransa sosiál.
“Ami toma nota, atu nune’e bele hadi’a ba oin, liuliu relatóriu sira ne’ebé mak ami bele hadi’a di’ak liután, iha relatóriu ezekusaun no atu ami bele koordena di’ak ho Ministériu Solidariedade Sosiál no Inkluzaun (MSSI) hodi bele fornese relatóriu mai husi seguransa sosiál nian,” Ministra kompremete.
Jornalista : Nelson de Sousa
Editora : Julia Chatarina
