DILI, 07 fevereiru 2023 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longunihos Armando Leite, hateten durante ne’e kontribuente iha Timor-Leste kontribui ona hamutuk millaun $115.9 ba Fundu Rezerva Seguransa Sosiál.
“Durante ne’e kontribuente kontribui ona osan ba seguransa sosiál no tuir dadus ikus liu ne’ebé mak ha’u simu no horibainhira ha’u ba aprezenta iha Komisuan C Parlamentu Nasionál, ita-nia osan iha Fundu Rezerva Seguransa Sosiál até dezembru 2022 hamutuk millaun $115,9 ne’ebé ita kapitaliza ona iha banku sentrál,” Prezidente INSS ne’e hateten Ag^encia Tatoli liuhosi programa Entrevista Eskluziva iha studio Faról, segunda ne’e.
Osan millaun $115.9 ne’e, nia fontr maihosi traballadór liu 100.000 no hosi númeru ne’e 55% hosi empreza privada nia traballadór sira no hosi 45% maihosi funsionáriu públiku sira.
Nia esplika, hosi osan ne’e INSS iha ona planu hamutuk parte relevante hahú hanoin atu kria Komité Investimentu ba investimentu osan refere.
“Agora mak ita hanoin halo investimentu. Ami hanoin kria hela komité investimentu ida, nune’e sira-nia servisu atu haree merkadu ne’ebé di’ak tanba osan ne’e ita tenke kapitaliza ona, nune’e ita tenke investe ona,” nia dehan.
Tanba, tuir nia, tinan 20 ba oin ne’e ema kontinua halo kontribuisaun maibé tinan 25 mai tan bele fila-an, tanba ema kontribui ne’e uitoan de’it ona no ema husu no simu nia oan mak barak ona.
“Entaun oinsá mak ita fasilita ida-ne’e, tanba ne’e ita hanoin hodi halo ivestementu ona nune’e ita bele halo sustentabilidade ba fundu ne’e rasik,” nia hateten.
Atu investe osan ne’e iha rai-laran ka iha rai-li’ur ne’e, kompeténsia Governu no presiza desizaun polítika maske osan ne’e povu nian.
“Ko’alia kona-ba orsamentu seguransa sosiál ita iha orsamentu rua, ida mak Governu ne’e ita bolu rejime naun-kontributivu mak inklui ho saláriu no pensaun sosiál sira no seluk maihosi kontribuisaun sira-ne’ebé ita-nia traballadór sira, no osan ne’e tau iha fundu rezerva,” nia dehan.
Jornalista : Osória Marques
Editór : Cancio Ximenes
