VIQUEQUE, 16 abríl 2024 (TATOLI)—Ministériu Petróleu no Rekursu Minerál (MPRM) no Autoridade Nasionál Minerál (ANM), tersa ne’e, atribui lisensa prospesaun no peskiza ba minerál metáliku iha postu administrativu Ossu, munisípiu Viqueque ba empreza husi Austrália, Beacon Minerals Ltd.
Ministru Petróleu no Rekursu Minerál, Francisco da Costa Monteiro, apresia ba investidór ne’ebé liu ona konkursu tanba iha interrese atu halo investimentu iha Timor-Leste.
“Ha’u agradese ba investidór tanba sira tanba iha prespetiva jeolojístiku no iha fiar katak aban bain-rua bele hetan rezultadu. Sira mós fó konfiansa ba ita-nia sistema lei inklui Governu no Estadu. Nune’e, investidór sira fakar sira-nia osan mai ita-nia rain hodi halo peskiza no esplorasaun. Ida-ne’e ita reza katak bele lori dezenvolvimentu mineiru iha Timor Leste,” Ministru hateten iha serimónia atribui lisensa peskiza, iha salaun Parókia Ossu.
Governante ne’e konsidera, peskiza ne’e importante hodi lori nasaun Timor-Leste ba dezenvolvimentu no hasai povu husi kiak.
“Ho atribuisaun lisensa ida-ne’e, aban empreza hahú sira-nia atividade peskiza. Ita mós fó apresiasaun ba Autoridade Nasionál Minerál ne’ebé lori prosesu ida-ne’e,” nia akresenta.
Notísia relevante : Empreza haat sai vensedór halo esplorasaun ba rekursu metáliku
Francisco da Costa dehan, Governu tau atensaun ba esplorasaun mineiru tanba tinan barak ona maka nasaun Timor-Leste depende liu ba rekursu petróleu liuhusi produsaun mina husi kampu Bayu-undan, ne’ebé daudaun besik hotu ona. Nune’e Timor-Leste bele tama ba problema finansiamentu Estadu, tanba ne’e kada ministériu ida-idak trasa ninia planu no programa hodi istimula dezenvolviementu ekonómiku, liu-liu rendimentu ba Estadu.
“Tanba ne’e, ita presiza halo dezenvolvimentu rikusoin mineiru hodi sai hanesan alternativa ida nune’e ita labele depende de’it ba mina no gás, maibé ita husu tulun ba matebian sira atubele hetan mineiru hodi hatama netik rendimentu ba nasaun no joven sira bele asesu ba kampu serbisu iha futuru,” nia akresenta.
Nune’e, nia husu ba autoridade, abitante no veteranu iha munisípiu Viqueque atu kolabora no koopera ba atividade peskiza ne’ebé sei implementa iha postu administrativa Ossu.
Iha biban hanesan, Prezidente Autoridade munisípiu Viqueque, Francisco Cruz Simões Gonzaga Soares, hateten, Governu halo ona identifikasaun mineiru iha área Ossu no nota katak nakonu ho rikusoin, nune’e fó esperansa ba dezenvolvimentu.
“Ha’u reprezenta Autoridade munisípiu Viqueque, deklara katak prontu atu kolabora, ami prontu serbisu hamutuk ho ministériu no empreza implementadór, ne’ebé hala’o iha área identifikadu ba peskiza iha postu Ossu. Tanba ha’u sente katak programa ida-ne’e ita atu hahú ita-nia dezenvolvimentu iha ita-nia rain. Ami espera atividade levantamentu sira-ne’e bele lori naroman ba povu Timor Leste,” nia realsa.
ANM sei halo kontrolu no superviziona ba atividade peskiza ne’ebé empreza implementa iha área konselasaun Mel2023-CA-ZB004 Ossu maka hanesan suku Builale, aldeia Henihuta, Uabubo área Laritame, Ossogori, Lequi-Buti, suku Uagia área Sam aliurai, Uatumantuku, Uaibobo área Samaliurai, Uaitai no Darenau, Nahareka área Darenau, Raila A, Maurate no Makabu U, Ossu de Cima área Cai Uai Hoo, Uairio, Liamida, Lugabuti, Basa-Isi, Belas no Borala, Ossorua área Umatamene, Fatudere, Uatu-Lawa, Raimuti, Umabere no Samalari área konselasaun Mel2023-CA-ZB006.
Iha suku Builo área Buareca, Builo, Derulo no Lutugia, suku Uabubo área Dauborubaha, Liqui-Buti, Ossogori, Laritame, Uailia. Área konselasaun Mel2023-CA-ZB007 iha suku Loi-Hunu área Lia Uai Oli, Samaliu, Wala Wau no Wai-Heda.
Nune’e, peskizadór husi empreza Beacon ne’e sei buka mineiru ho alvu hanesan kore, ouru (osan mean), magneziu no osan mutin.
Atividade referidu ne’e sei hala’o durante tinan-haat no sei aprezenta relatóriu ba ANM kona-ba rezultadu peskiza ne’ebé empreza implementa.
Serimónia emite lisensa peskiza ne’e hetan partisipasaun husi Autoridade postu Ossu, veteranu no Prezidente empreza Murak Rai, Empreza Públika (Murak Rai, E.P), Polísia Nasionál Timor-Leste Eskuadra Ossu no abitante lokál.
Jornalista : Vitorino Lopes da Costa
Editora : Julia Chatarina
