BOBONARO, 17 abríl 2024 (TATOLI)-Vise Ministru Obra Públika ba Asuntu Infraestrtutura, Julio do Carmo, ejize ba kompañia sira iha munisípiu Bobonaro atu finaliza projetu reabilitasaun estrada rurál, ponte no seluk tan ne’ebé maka implementa ona hahú iha tinan 2017 maibé to’o agora seidauk konklui.
“Atu dehan ba ita-bo’ot sira projetu sira ne’e asina iha 2017 mai to’o 2022 ne’e la tolera, tenke termina iha 30 fulan-maiu, se mak la hotu blacklist diretór kompañia ne’e, identifika nia oan fen hotu kedas labele ka’er tan projetu, ita labele halimar, tanba ne’e mak hau husu servisu tenke aselera para bele hotu lalais,” Nia hateten durante halo enkontru ho diretór kompañia sira iha salaun enkontru administrasaun munisipál Bobonaro, tersa ne’e.
Notísia Relevante:MOP sei reabilita estrada rurál pakote 13 iha Bobonaro
Governante ne’e amesa, ba futuru sei servisu hamutuk ho ekipa tékniku sira atu identifika loloos kompañia sira ne’ebé maka durante ne’e implementa projetu la tuir kontratu nune’e sei la fó tan projetu ba empreza sira ne’e hodi implementa.
“Nia halo ida seidauk hotu ba fó tan nia halo saida, be ida seidauk hotu ne’e mak atu halo fali, ne’ebe ba oin hau rona dehan nia hola dukumentu subar mak manán tender mós hau husu troka fó ba ema seluk tanba nia seidauk halo hotu ninia servisu ida,” Governante ne’e hateten.
Iha tempu hanesan Diretór servisu munisipál Obra Publika, munisípiu Bobonaro, Marcelino Gonsalvez Godinho, hateten inisiativa governu hodi re-avalia projetu sira ne’e importante tebes tanba projetu balun implementa ona durante tinan barak ona maibé seidauk finaliza tuir data ne’ebé mensiona iha kontratu.
Projetu konstrusaun infraestrutura bázika hamutuk pakote 34, kompostu hosi reabilitasaun estrada rurál hamutuk 24, estrada nasionál iha pakote rua, kontrusaun estrada no ponte iha pakote rua, pakote emerjénsia hamutuk lima.
“Projetu sira ne’e balun nia progresu la’o ho di’ak, balun la’o la di’ak, balun desde 2016 to’o agora seidauk hotu, ita espera ho vizita vice Ministru nian ita bele identifika sira nia problema tanba saida mak projetu sira ne’e to’o agora la hotu,” nia hatutan.
Entretantu, hafoin enkontru entre Vice Ministru ho ekipa tékniku halo kedas re-avaliasaun ba projetu sira iha área Maliana ho suku Saburai, no iha loron 17 fulan-abríl ekipa kontinua kedas halo avaliasaun iha postu administrativu Cailaco no sei kobre ba postu administrativu Bobonaro, Loloto’e, Balibo no Atabae.
Notísia Relevante:Governu sei reabilita estrada rurál kilómetru 50,7 iha Bobonaro
Jornalista: Sergio da Cruz
Editór:Agapito dos Santos
