DILI, 18 abríl 2024 (TATOLI)–Arsebispu Arkedioseze Metropolitana Dili, Dom Vírgilio Kardeál do Carmo da Silva, SDB hateten igreja Timor-Leste hili ona tema “A vossa fé seja a vossa Cultura” durante vizita sua santidade Papa Francisco iha Timor-Leste hahú loron 09 to’o 11 fulan-setembru 2024.
“Fiar hanesan baze ka identidade ida, fiár ida ne’e mak sai fundamentu ida ba ita-nia moris nu’udar sarani. Fiár hanorin ita atu ka’er liman hamutuk, hanorin ita atu hatene lolo liman ba malu, hanorin ita hatene respeita, hadomi no perdua malu. Entaun, amu Papa nia vizita ne’e hakarak fó forsa liután ba ida ne’e atu imi nia fiár ne’e bele forte, liu-liu ita katólika fiar hanesan identidade no kultura,” nia dehan asuntu ne’e hafoin partisipa serimonia lansamentu fatuk dahuluk ba konstrusaun altar iha Tasi-Tolu Dili, kuarta ne’e.
Notísia Relevante :Mari Alkatiri konsidera vizita Papa Francisco nu’udar grasa no bensaun ba povu
Objetivu hosi vizita Papa Francisco nian ne’e maka atu hametin, haburas liután fiár nu’udar identidade no kultura timoroan nian hanesan sarani katólika iha mundu.
Dom Vírgilio reforsa liutan katak iha vizita Papa nian mos sei hamanas liután fiár no unidade kreda katólika timoroan , liuliu sente povu úniku ne’ebé sente no hamahan aan ba iha lialos Maromak nian.
“Papa nia vizita mai Timor-Leste hanesan imajén ida katak susesór Jesus ninian ne’ebé hamanas liután fiár no lori unidade,” nia hateten.
Ko-naba preparasaun igreja Timor-Leste nian relasiona ho Papa ninia vizita, Arsebispu ne’e relata, dioseze tolu hanesan Maliana, Baucau no Dili, sei fó formasaun ka katekeze ida ba sarani sira ko-naba importansia vizita Papa nian.
Iha formsaun ne’e sei esplika ko-naba Papa ninia dokumentu importante sira hanesan ladato sí, fraternidade umana no problema ka situasaun atuál iha mundu atu sosializa ninia dokumentu sira ba ema hotu ezemplu ko’alia ko-naba problema klimátika mundiál.
“Papa ema ida ne’ebé hatudu teb-tebes nia preokupasaun ne’ebé ema barak uza nia dokumentu laudato sí ko-naba situasaun mudansa klimátika mundiál. Dokumentu sira hanesan hanesan bolu ida atu ema hotu hatene no haree,” Nia hatutan.
Notísia Relevante :Papa Francisco sei vizita Timor-Leste iha 09-11 setembru 2024
.Jornalista: Jesuína Xavier
Editór: Agapito dos Santos
