DILI, 22 abríl 2024 (TATOLI) – Prezidente Repúblika José Ramos Horta, ohin, dezloka ona ba Portugal no Estadus Unidus Amérika (EUA) durante semana ida.
“Loron 23 to’o 28 fulan-abril, Prezidente sei iha Portugal hodi partisipa iha selebrasaun aniversáriu Revolusaun Karvu ba da-50. Iha tempu ne’ebá, rejime Estado Novo nian loke dalan ba Portugal nia territóriu sira iha rai-li’ur hodi hetan independénsia, inklui Timor-Leste,” Horta hatete liuhusi nota ne’ebé Agência TATOLI asesu, segunda ne’e.
Durante iha Portugal, Prezidente sei hasoru malu ho Prezidente Repúblika Portugeza, Marcelo Rebelo de Sousa, Prezidente Asembleia Nasionál, José Pedro Aguiar-Branco no Primeiru-Ministru Luís Montenegro hodi ko’alia asuntu serbisu balun.
Alende ne’e, Prezidente Ramos Horta sei halo viajen ba New Jersey iha loron 29 fulan-abríl, no sei hato’o dikursu formatura iha Universidade Rutgers ba tinan ida-ne’e, iha loron 30.
Nune’e Xefe Estadu sei fila husi Estadu Unidu iha loron 1 fulan-maiu no to’o iha Dili iha loron 03 fulan-maiu 2024.
Jornalista: Hortencio Sanchez
Editór: Rafael Ximenes de A. Belo
