DILI, 29 abríl 2024 (TATOLI)—Serbisu alargamentu estrada dirasaun Raikotu to’o rotunda Prezidente Nicolau Lobato, ne’ebé toma-konta husi empreza Montana Diak, daudaun ne’e atinje ona 34%.
“Ita halo dalan-haat, katak halo separadór hanesan mós dalan boot sira ne’e, entaun liga filafali ba dirasaun Tasi-tolu ninian, daudaun empreza halo serbisu to’o ona 34%, obra ne’e tuir loloos kontratu termina iha dezembru 2024, maibé ita tenta posível termina sedu tanba obra ne’e importante tebes tanba sai hanesan trosu ida-ne’ebé mak ita prepara ba vizitasaun Amu Papa mai iha fulan-setembru ne’e,” Diretór Nasionál no Konstrusaun Via Rodaviáriu husi Ministériu Obra Públika (MOP), Milton Monteiro, informa ba Agência Tatoli, iha ninia knaar fatin, Raikotu, segunda ne’e.
Notísia relevante : Konstrusaun estrada iha rotunda Comoro to’o Raikotu la’ós urjénsia
Diretór esplika, progresu serbisu kiik tanba seidauk atinje gráfika sai nian, nune’e espera katak fulan ne’e nia laran bele tama ona ba pavimentu estrutura estrada, hanesan aterru no seluk tan.
“Espera maiu no juñu ne’e bele atinje ona 70%-80%, nune’e to’o iha agostu 2024 ne’e finaliza ona no ninia pavimentu kaber ona,” nia akresenta.
Dalan ne’e loloos halo ona konstrusaun iha tinan hirak ba kotuk, maibe tanba kestaun indenizasaun ba komunidade inklui eskola São Miguel maka serbisu foin mak hahú fali.
Antes ne’e, Governu liuhusi MOP fó ona indenizasaun ba komunidade afetadu inklui parte eskola, ho montante millaun $1-resin.
Estrada ne’e ho naruk kilómetru 1,2 no ho ninia kustu ba obra ne’e rasik hamutuk millaun $4,2.
Jornalista : Arminda Fonseca
Editora : Julia Chatarina
