iklan

SOSIEDADE SIVĺL

Governu-Igreja kalkula sarani 500.000-resin partisipa misa iha Tasi-tolu

Governu-Igreja kalkula sarani 500.000-resin partisipa misa iha Tasi-tolu

Lagoa Tasi-Tolu nia furak bele sai potensia turistiku. Imajen/Foti husi google.

DILI, 30 abríl 2024 (TATOLI)–Papa Francisco, tuir kalendáriu, sei hala’o vizita Estadu no vizita pastorál duarnte loron tolu iha Timor-Leste ne´ebé sei hahú iha loron 09 no sei ramata iha loron 11 setembru 2024.

Notísia Relevante: Empreza Karya Timor sei finaliza konstrusaun altar misa Amu Papa durante fulan-haat

Vise Kordenadór ba preparasaun vizita Papa nian hosi igreja no atuál Pároku Motael, Guilhermino da Silva, hateten Governu no igreja kalkula ona sarani sira hamutuk 500.000-resin ne’ebé mak sei partisipa iha misa vizita amu Papa Francisco nian iha Tasi-tolu.

Nia esplika, hosi parte Igreja liliu Konferénsia Episkopál Timorense (CET, sigla protugés sei organiza sarani sira mai husi Dioseze Baucau, Dioseze Malaiana no Dioseze Dili hodi hodi bele ba partisipa iha misa ne´e.

“Ita-nia populasaun Timor tuir sensu 2022, iha millaun 1.3, agora iha kalakulasaun ne’e bele to’o 500.000 to’o 600.000 sarani Timor-Leste bele mai iha Dili, atu bele partisipa misa iha Tasi-Tolu,” Pároku Motael, Guilhermino da Silva, hateten ba Agência Tatoli, iha nia rezidénsia iha Motael, segunda (29 abríl 2024) ne´e.

Aleinde ne´e, nia hateten, sarani sira hosi nasaun viziñu sira hanesan provinsia Timor Osidentál, Kupang, Indonézia no Darwin-Austrália.

“Sarani sira hosi Indonézia mos komesa husu fatin atu hela, ne’e signifika bele atinje númeru sira-ne´e, bele konsentra iha Dili atu partisipa misa iha Tasi Tolu,” nia dehan.

Vizita Papa Francisco ida-ne´e nu’udar vizita Estadu dahuluk Papa Francisco mai Timor-Leste hafoin Timor-Leste restaura independénsia iha Tasi-Tolu, 20 maiu 2002, no hanesan vizita daruak hafoin Papa João Paulo II vizita Timor-Leste iha okupasaun Indonézia iha 12 outubru 1989.

Papa Francisco vizita nasaun 4 iha Asia no Oseania

Tuir portál ofisial Vatican News haktuir, Papa Francisco sei hala’ o nia vizita pastorál iha Indonézia, Papua Novaguine, Timor-Leste no Singapura iha 2-13 September 2024.

Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisvo sei vou hosi Roma iha 02 setembru no sei fila-fali ba Roma iha 13 setembru 2024.

Notísia Relevante: Estátua João Paulo II triste haree Tasi-Tolu nia oin “sabraut”

Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’ o 06 setembru 2024. Populasaun Indonézia maiória Musulmanu ne´ebé boot iha mundu no Katólika kuaze populasaun juta ualu (8) ka ekivalente 3,1%

Hafoin ne´e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024. Populasaun iha Papua Novaguine 32% sarani Katólika ka kuaze ema hamutuk juta rua.

Husi ne´eba, Papa Francisco sei vizita Dili-Timor-Leste durante loron tolu ne´ebe sei hahú hosi iha 09-11 setembru 2024. Timor-Leste maiória relijiaun Katólika ho populasaun 96% ka ema hamutuk juta ida.

Hafoin ne´e, Papa Francisco sei vizita Singapura durante loron tolu hahú hosi 11-13 september 2024. Maizumenus iha sarani Katólika hamutuk 395.000 ne´ebé hela iha Singapura ne´e reprezenta kuaze populasaun 3%.

Entretantu, Papa Francisco halo vizita pastorál mai Timor-Leste ne´e sei akompaña husi bispu no kardeál hamutuk 55 no jornalista internasionál hamutuk ema na’in-85.

Notísia Relevante: Cobra husu Governu konserva no halo lutu hale’u lagoa Tasi-Tolu

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!