DILI, 13 maiu 2024 (TATOLI)– Prezidente Repúblika, José Ramos Horta, hatete, fujitivu Arnolfo Trves Jr no familia la elijivél hetan aziliu polítiku husi Estadu Timor-Leste, nune’e tenke deporta ka haruka fila ba Filipina.
“Ha’u hatene kona-ba azilu polítiku buat sira ne’e ha’u hatene, direitu umanitáriu, direitu internasionál, direitu ba aziliu, ha’u estuda barak ne’ebé ha’u hatene no ha’u hatene se mak elijivél no sé mak la elijivél. Sr. Teves la elijivel atu hetan aziliu polítiku iha Timor-Leste,” Xefe Estadu katak ba jornalista sira iha Palásiu Prezidensiál Dili, segunda ne’e.
Nia dehan, Teves Jr iha mandadu husi Interpol no Timor-Leste tenke intrega ba Filipina hodi kumpre justisa.
“Timor-Leste iha obrigasaun atu kumpre mandadu detensaun mai husi Interpol. Se ita la haruka nia fila sei fó implikasaun ba Timor-Leste nia adezaun ba ASEAN,” katak PR Horta.
Iha semana kotuk loron (12/05/2024), kaben husi fujitivu Candice Teves husu Estadu Timor-Leste atu salva nia kaben Fujitivu Arnolf Teves Jr hodi aseita no aprova pedidu aziliu politiku.
“Nia familia sira buat ketak ida, nia mak tenke kumpre hodi ba hata’an justisa Filipina nian tanba komete sala iha ne’ebá, Interpol la halo mandadu ne’e arbiru, sira halo mandadu ne’e tanba sira iha informasaun 100% katak ema ne’e komete duni krime, Filipina rai ida demokrasia hanesan mós Timor-Leste, sira la mais la menus duke ita, laiha razaun atu husu azilu polítika, so Korea do Norte karik mak husu azilu polítika ita tenke atende kedan,” Xefe Estadu afirma.
Tuir nia, Filipina laiha pena morte, ho nune’e la impaktu atu haruka fila fujitivu ne’e. Bainhira Filipina iha pena morte mak Timor-Leste kuidadu atu fó fila sidadaun ne’e.
Rekorda katak iha sesta (21/3/2024), iha tuku 16:00 loraik, PCIC halo detensaun internasionál hasoru sidadaun Filipinu Arnolfo Teves Jr, iha área Cristo Rei bainhira sidadaun ne’e halimar Golf iha fatin ne’e.
PCIC halo detensaun internasionál tanba simu informasaun hosi Interpol internasionál no National Bureau of Investigation (NBI) katak sidadaun ne’e komete krime asasinatu ida iha Filipina.
Fujitivu Arnolfo Teves Jr to’o iha Timor-Leste iha loron 27 fulan-Abríl 2023, liu deit loron ida depois husu kedan azilu polítiku bá Estadu Timor-Leste.
Dadaun ne’e fujitivu Arnolfo iha hela prizaun Becora hodi hein desizaun husi Estadu Timor-Leste.
Notisia relevante: PCIC suspende membru tanba suspeita husu osan ba oan hosi fujitivu iha estabelesimentu prizionál
Jornalista: Hortencio Sanchez
Editor: Florencio Miranda Ximenes
