BOBONARO, 15 maiu 2024 (TATOLI) – Estadu Unida Amérika liuhosi Diretora Tékniku Ajénsia Estadu Unida ba Dezenvolvimentu Internasionál (USAID, sigla ingles), Rebecca Robinson, hamutuk ho Reitór Institute Off Business, Pedro Ximenes, kuarta ne’e lansa estabelesimentu sentru dezenvolvimentu feto no foinsa’e ne’e e lokaliza iha kampus polo (IOB) suku Holsa, postu administrativu Maliana, munisípiu Bobonaro.
Diretora Tékniku USAID iha Timor-Leste, Rebecca Robinson, esplika, sentru ne’e importante tebes, ho intensaun atu halo investimentu ba joven feto ho mane no ema ho defisiénsia atubele dezenvolve sira-nia koñesimentu no abilidade ne’ebé mak sira presiza nune’e ba futuru prepara didi’ak sira nia-aan ba serbisu no kria rasik kampu traballu.
Sentru ne’e estabelese liuhusi projetu USAID ho naran Womand And Youth Creating Our Future, ne’ebé hanesan ponte ida atu liga merkadu entre empregadór no empregada hodi responde ba nesesidade ne’ebé mak joven sira presiza.
Sentru estabelese liuhusi parseria entre USAID ho IOB no seluk tán hodi fornese kursu sira hanesan; ICT, ospitalidade, kontablidade, office manajement, dezeñu gráfiku, manajementu bisnis, eletrónika, karpintária, ingles no portugés.
“Ohin loron ita iha Maliana, halo lansamentu, hanesan benvindu ba foin sa’e sira hotu, atu nune’e bele hetan matenek no abilidade ne’ebé mak sei fornese husi profesór sira no mós ita-boot sira bele halo ona negósiu ruma, joven sira partisipa iha sentru ida-ne’e ita sei hetan koñesimentu no esperiénsia ne’ebé mak presiza atu kontribui ba família,” nia hateten iha intervensaun
Reitór Institute Off Business (IOB), Pedro Ximenes, hateten, atividade formasaun ba dahuluk sei hala’o ho programa rua hanesan ingles no kursu ICT no sei aumenta kursu sira seluk bainhira hetan progresaun no anima husi foinsa’e sira.
Reitór Pedro hatutan, ba oin governu liuhusi Ministériu Ensinu Superiór, Siénsia no Kultura sei konstrui tán dormitóriu ne’e no bele akomoda ema 120.
“Ida-ne’e la’ós sira ketak-ketak, maibé familia boot iha husi IOB, ho ita-nia dormitóriu sira-ne’e ita hein katak sira bele kobre estudante barak liu, mai husi munisípiu, postu, husi suku sira-ne’ebé dook, sira bele partisipa no hela iha dormitóriu ne’e,” nia katak.
Xefe suku Tapo, Xivier Barreto, agradese no apresiza ba parseiru USAID no IOB ne’ebé iha inisiativa di’ak estabelese sentru formasaun ne’e.
“Ha’u haree ho programa hirak-ne’e bele motiva ona ita-nia foinsa’e sira liuhusi parte hotu-hotu, tanba formasaun ne’e importante tebes hahú ohin no ba future,” líder komunitária ne’e akresenta.
Enkuantu Sentru iha Maliana ne’e nu’udar sentru daruak hafoin halo lansamentu iha Dili fulan marsu liubá no sentru datoluk iha tempu badak sei lansa iha munisípiu Baucau.
Projetu ne’e USAID implementa ho durasaun tinan-lima ho montante orsamentu millaun $7,5 hodi fornese formasaun profisionál no empreendedorizmu ba foinsa’e timoroan sira.
Enkuantu durante pilotu ba projetu ne’e, foinsa’e feto ho mane inklui ema ho defisiénsia na’in-280 mak partisipa kursu ne’e, hosi númeru referida iha estudante na’in-15 mak hetan ona serbisu iha setór privadu no instituisaun governu.
Notísia relevante: USAID iha kompromisu apoia TL hametin valór demokrásia no kombate korrupsaun
Jornalista: Sérgio da Cruz
Editór: Evaristo Soares Martins
