Prezidente CCLN sujere Governu investe iha setór haat
DILI, 20 maiu 2024 (TATOLI)—Prezidente Konsellu Kombatente Libertasaun Nasionál (CCLN, sigla portugés), Vidal de Jesus ‘Riak Leman’ sujere ba Governu hodi investe iha setór haat hanesan edukasaun, saúde, turizmu no agrikultura hodi bele lori mudansa ba povu nia moris.
“Hafoin restaurasaun independénsia, povu nia vida iha mudansa tanba livre ona husi inimigu no bele halo atividade saida de’it laiha limitasaun, maibé ho ukun-an ida-ne’e povu balun moris iha kiak nia-laran, liu-liu iha área remota, difuldade hasoru iha parte oin-oin. Ida-ne’e Governu nia resposabilidade tomak atu halakon kiak presiza investe iha edukasaun, saúde, turizmu no agrikultura tanba liuhusi dalan sira ne’e ita bele dezenvolve-an, hamenus kiak no dezenvolvimentu ekonomia mós sei iha mudansa,” Vidal de Jesus ‘Riak Leman’, informa ba Agência Tatoli, iha Palásiu Prezidensiál hafoin partisipa iha loron restaurasaun indepedénsia ba dala-22, segunda ne’e.
Notísia relevante : Veteranu Viqueque prefere Governu investe liu iha setór agrikultura
Nia konsidera, setór haat ne’e importante tanba bainhira investe iha edukasaun sei iha matenek barak halo mudansa ba rai ne’e no saúde Estadu la presiza gasta osan kontratu médiku husi rai-li’ur mai maibé Timor-Leste iha rasik médiku espesialista rasik.
Enkuantu, bainhira turizmu la’o di’ak maka sei atrai ema barak mai lori osan tama no agrikultura bele halo mudansa ba povu kiik nia moris tanba povu kuda Governu sosa.
Veteranu ne’e haree, Governu mós presiza fó apoiu maka’as ba emprezáriu lokál sira-ne’ebé sai nu’udar parseiru Governu, nune’e bele loke kampu traballu ba povu kiik hodi halo mudansa ba povu nia moris.
“Loos duni, daudaun Governu halo parseiru ho nasaun barak hodi haruka traballadór sira ba serbisu iha rai-li’ur hodi haruka osan mai, hanoin ida-ne’e kompleta malu maibé importante tebes mós investe maka’as ba emprezáriu lokál sira nune’e sira mós fó kampu serbisu ba sira-ne’ebé la hetan oportunidade bá rai-li’ur bele serbisu iha rai-laran,” nia akresenta.
Veteranu ne’e dehan, investe maka’as iha setór privadu sira liuhusi dalan oin-oin, hanesan Governu bele fó projetu liga ba infraetrutura báziku no seluk tan ne’ebé bele fó serbisu ba timoroan sira.
Riak leman nota, ekonomia rai-laran iha ona mudansa oituan tanba hafoin ukun-an to’o mai agora Estadu hahú apoiu uma ba veteranu, simu pensaun no balun rejistu iha prosesu atu taka sai no seluk tan.
“Husi ne’e ita haree liga ba ekonomia mudansa totalmente laiha, maibé hahú mudansa tanba Estadu rekoñese sira-nia luta no sakrifísiu ba rai ne’e,” nia tenik.
Iha biban ne’e, veteranu ne’e mós husu foin-sa’e sira hodi hametin unidade lori dezenvolvimentu la’o bá oin.
“Tempu to’o ona joven sira hametin unidade nasionál hodi lori dezenvolvimentu la’o bá oin tanba tempu ohin loron, tempu luta ba dezenvolvimentu nian,” nia enkoraja.
Jornalista : Arminda Fonseca
Editora : Julia Chatarina
