Laloran-boot kauza anin Monsoon husi Austrália
DILI, 21 maiu 2024 (TATOLI)—Diresaun Nasionál Meteolorojia no Jeofízika (DNMG, sigla portugés) fó informasaun relasiona ho laloran-boot iha parte kosta norte, hanesan iha Dili, Liquiçá, Manatuto, Baucau, Lautém, no Rejiaun Administrativa Espesiál Oé-cusse Ambeno (RAEOA).
“Husi Ami DNMG hakarak informa ba públiku relasiona akontesementu laloran-boot iha parte Pantai Kelapa, foin oras balun liubá, ida-ne’e kauza husi anin ne’ebé ativu hela husi Austrália ho naran Monsoon hodi provoka laloran-boot iha parte Kosta Norte,” Meteorolojista, Jacinto Auni, informa ba Agência Tatoli, iha ninia knaar-fatin, Merkadu Lama, tersa.
Eventu ne’e hahú ho volume normál to’o moderadu, durante loron-tolu hahú ohin to’o bain-rua.
“Laloran boot extremu akontese hanesan ohin, ba loron ohin de’it, ba loron aban nian ne’e kontinua akontese maibé to’o normál moderadu,” nia dehan.
Notísia relevante : DNMG alerta Timor-Leste hetan ameasadu bailoro naruk to’o tinan oin
Ba kosta súl nian hanesan munisípiu Covalima, Manufahi, Lautém no Viqueque ne’e sei akontese husi moderadu to’o forte liu no posibilidade ba extremu 1,9 km/h to’o 1,3km/h.
“Ita haree previzaun ne’e ba parte kosta súl nian, hahú aban laloran tasi sei varia husi normál ba moderadu to’o forte,” nia akresenta.
Nune’e, Meteorolojista husu ba públiku, liu-liu munisípiu lima ne’ebé lokaliza iha rejiaun kosteira nian atu toma kuidadu ho laloran tasi ne’ebé sempre halo mudansa, maski akontese la extremu liu maibé nafatin kuidadu-an.
“Tanba dalaruma akontese dezastre ne’ebé ita la espera,” nia tenik.
Jornalista : Arminda Fonseca
Editora : Julia Chatarina
