OÉ-CUSSE, 23 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, kinta ohin, oferese rai ektare ida iha jardín Oébau ba FALINTIL-Forsa Defeza Timor-Leste (F-FDTL) hodi konstrui edifísiu Komponente Navál nian atu proteje rikusoin iha tasi hodi kontrola atividade peska ilegál iha territóriu Oé-Cusse.
Notísia relevante: Falur observa kondisaun Komponente Navál ne’ebé destaka iha RAEOA
Prezidente Autoridade RAEOA, Rogério Tiago Lobato, konsidera prezensa Komponente Navál iha Oé-Cusse importante, hodi serbisu hamutuk ho Polísia Nasionál Timor-Leste (PNTL) liuhusi Polísia Unidade Marítima (UPM) atu proteje rikusoin iha tasi no kontrola atividade peska ilegál.
“Autoridade sei fó apoia tomak, la’ós apoia rai de’it maibé apoia mós orsamentu nune’e bele reabilita lalais fatin ne’e, nune’e forsa navál sira bele mai lalais, entaun prezensa komponente navál iha ne’e importante, sira sei serbisu hamutuk ho unidade marítima husi polísia nian, tanba dalaruma iha peska ilegál, depois forsa rua ne’e koopera hamutuk atu tau matan ba atividade peska ilegál iha territóriu Oé-Cusse,” Rogério Tiago Lobato, ba jornalista sira iha jardín Oébau.
Komandante Komponente Navál F-FDTL, Comodoro Higino das Neves, agradese tanba fatin ne’ebé oferese estratéjiku tanba iha ona fasilidade, maibé presiza halo manutensaun nune’e bele fasilita serbisu komponente navál iha Oé-Cusse.
“Ohin ami mai hasoru Prezidente Autoridade RAEOA, atu entrega ofisiál fatin ida ba Komponente Navál atu uza hodi bele hala’o nia atividade, ho fasilidade kuaze iha ona presiza halo manutensaun de’it, tan ami agradese tanba autoridade apoia 100% hodi bele ajuda Komponente Navál nia serbisu iha ne’e, no sei koopera ho autoridade RAEOA no sei ajuda buat balu iha Oé-Cusse,” nia agradese.
Notísia relevante: Komponente Navál salva peskadór 14 iha tasi klaran
Entretantu, jardín Oébau lokaliza iha aldeia Sanane, suku Costa, sub-rejiaun Pante Makasar, no iha serimónia atribuisaun rai ektare ida-ne’e, hetan akompaña direita husi serbisu terra propriedade no autoridade komunitáriu suku Costa.
Jornalista: Abílio Elo Nini
Editór: Evaristo Soares Martins
