COVALIMA, 24 maiu (TATOLI) – Servisu Edukasaun munisípiu Covalima daudaun-ne’e halo ona prosesu orsamentu konsesaun eskolár tinan 2024 ba eskola bázika sentrál públiku 20 ho nia filiál 70, iha munisípiu Covalima.
“Eskola sira seidauk simu orsamentu konsesaun eskolár maibé hafoin finaliza treinamentu maibé semana oin sira bele foti ona pedidu atu foti konsesaun eskolár kada eskola ba fulan-neen”, Diretora Servisu Edukasaun Covalima, Elda de Fátima, informa ba TATOLI, iha resintu AMC, sesta-ne’e.
Tuir regra, eskola hetan orsamentu konsesaun eskolár tinan-ida dala rua hanesan periódu dahuluk eskola foti hahú fulan-janeiru to’o juñu no periódu ba daruak eskola foti hahú iha fulan-jullu to’o dezembru.
Daudaun ne’e Edukasaun fó sai ona avizu ba diretór eskola ho koordenadór eskola filial, segunda semana oin eskola bázika públiku iha Covalima atu foti ona pedidu konsesaun eskolár iha Edukasaun Covalima atu halo prosesu maibé presiza aprezenta mós ho planu.
Dirijente ne’e dehan, kona-ba nominál orsamentu konsesaun eskolár ne’ebé mak Ministériu Edukasaun aloka ba kada estudante husi eskola bázika Sentrál Públika ho montante $ 2.00 ensinu báziku Privada kada estudante ho montante $ 1.00 no ensinu bázika Katólika kada estudante aloka $ 1.00
Totál orsamentu konsesaun eskolár ba eskola bázika 20 ho nia filiál 70 ne’ebé Ministériu Edukasaun (ME) aloka ba Covalima 2024 hamutuk $ 170 ,088.
Diretór Eskola Bázika Centrál Beilaku, Augusto Ferreira reforsa, Eskola sira simu ona orientasaun husi Edukasaun Covalima atu foti pedidu nune’e eskola bele foti ona osan konsesaun eskolár periódu dahuluk ba tinan 2024.
“Ha’u verifika ona dadus ne’ebé konsesaun eskolár ba eskola bázika Beilaku hamutuk rihun $ 8-resin ba fulan-neen, tuir regra antes eskola foti konsesaun eskolár foti kada trimesterál maibé dadaun-ne’e eskola foti konsesaun eskolár tinan-ida dala-rua de’it,” nia dehan.
Regra antes ne’e eskola bázika sentrál mak sosa materiál ATK hafoin distribui ba eskola Bázika Filiál sira, maibé regra agora Eskola Bázika Sentrál foti osan konsesaun eskolár hafoin halo enkontru ho koordenadór eskola Bázika Filiál kontinua aloka osan no EBF rasik mak sosa rasik materiál ATK eskola.
Jornalista: Celestina Teles
Editór: Rafael Ximenes de A. Belo
