iklan

INKLUZAUN SOSIÁL

EhD preokupa ho asesibilidade infraestrutura asesu ba edukasaun

EhD preokupa ho asesibilidade infraestrutura asesu ba edukasaun

Diretór Interinu AHDMTL, Gabriel Ponciano de Sousa. Imajen Tatoli/Francisco Sony

DILI, 24 maiu 2024 (TATOLI)—Ema ho Defisiénsia (EhD) iha Timor-Leste, kontinua preokupa ho asesibilidade infraestrutura eskola bainhira asesu ba edukasaun públiku.

Diretór Interinu Asosiasaun Halibur Defisiénsia Matan Timor-Leste (AHDMTL), Gabriel de Sousa, hateten asesibilidade infraestrutura eskola nian mak sai problema ba ema ho defisiénsia sira no ida-ne’e la proteje ema defisiénsia sira, maibé hakarak ka lakohi ida-ne’e mak sai obstakulu maske ema ho defisiénsia sira nafatin iha obrigasaun hodi asesu ba edukasaun.

“Ami ema kondisaun defisiénsia mós lakohi lakon asesu ba edukasaun. Tanba ne’e ami nafatin esforsu oinsá bele asesu edukasaun hanesan mós ema la ho defisiénsia sira. Ami hakarak rekomenda katak Governu presiza duni tau atesaun ba asuntu ne’e, tanba iha Governu Konstituisionál da-sia (9) nia planu ne’e hateten fó atensaun ne’ebé hanesan ba ema ho defisiénsia no ema la ho defisiénsia sira. Tanba ne’e Ministériu edukasaun tenke toma ba ida-ne’e” nia hateten ba Agência Tatoli, kinta ne’e.

Tuir relatóriu Planu Asaun Nasionál ba Ema ho Defisiénsia (PANED) 2014-2018 nian, dadus publikasaun husi Diresaun Nasionál Estatístika Ministériu Finansa nian hatudu ema 48.243 ne’ebé hela iha Timór ho tipu defisiénsia balun.

Ida-ne’e husi totál ida husi ema 1.066.409 ka besik 4,6% husi populasaun, katak ema ho defisiénsia fízika hamutuk 20.593, ema ho defisiénsia matan 29.488, ema ho defisiénsia tilun 17.692, ema ho defisiénsia intelektuál no saúde mentál hamutuk 13.308.

Husi totál ne’e, 53% mane no 47% feto, hafoin 10,5% iha otas entre tinan 0 no 19 no defisiénsia sai hetok komún iha área rurál sira.

Hatán ba preokupasaun ne’e, Diretora Jerál Administrasaun no Finansa iha Ministériu Edukasaun (ME), Cecília Assis, hateten tuir Lei Orgánika 17/2023, Setembru, iha Diresaun Nasionál ne’ebé trata ba asuntu ida-ne’e, nia planu anuál orsamentu ne’eMinistériu Edukasaun tau ona osan hodi sosa materiál ba ema ho defisiénsia mak ekipamenutu ba braille nian, headset ba defisiénsia tilun nian, ai-tonka ba sira-ne’ebé lahatene la’o ne’e.

“Ida-ne’e iha 2024 ami halo ona akizisaun, ekipamentu hirak-ne’e balun sosa ona no balun hein sosa tinan oin,” nia dehan.

Tuir planu, ME sei loke sentru komunitáriu ba ba ema ho defisiénsia iha munisípiu Aileu, Dili, no Lautém, nune’e ema ho defisiénsia bele hala’o sira-nia formasaun no tinan oin sentru ne’e sei alarga ba RAEOA, tanba iha RAEOA identifika ema ho defisiénsia barak.

“Ema ho Defisiénsia ita labele loke eskola ketak. Sira tenke hamutuk ho ema baibain, tanba iha programa IX Governu konstituisional nia planu ne’e dehan nune’e “Acegurar todas as crianças e jovens tenho sejam ensino de qualidade independentemente da sua condições social e economia”. Tanba ne’e, ita fó prioridade ema hotu-hotu hanesan hodi asesu ba edukasaun,” nia hateten.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!