NASIONÁL

Espetativa MAPPF ba 2028, natar iha territóriu TL atinje ektare rihun-50

Espetativa MAPPF ba 2028, natar iha territóriu TL atinje ektare rihun-50

Ministru Agrikultura, Pekuária, Peska no Floresta (MAPPF), Marcos da Cruz. Imajen Tatoli/Egas Cristóvão

DILI, 24 maiu 2024 (TATOLI) – Ministru Agrikultura, Pekuária, Peska no Floresta (MAPPF), Marcos da Cruz haktuir katak Timor-Leste sai ona membru Organizasaun Mundial Komérsiu (OMK), tanba Ministériu iha kompromísiu halo esforsu hodi hasa’e produsaun iha rai-laran ho intensaun atu sustenta uluk nesesidade povu iha nasaun ne’e.

Ministru Agrikultura, Pekuária, Peska no Floresta (MAPPF) dehan, daudaun ne’e Timor-Leste tama iha númeru má nutrisaun aas kuaze 47% ne’ebé afeta ba labarik krekas kuaze 8,6% afeta ba labarik sira tinan-lima mai karaik hamutuk 4%.

Kauza sira ne’e akontese tanba númeru populasaun ne’ebé atu konsumu ai-han ne’ebé nutritivu menus tebes. Tanba ne’e polítika Ministériu nian atu iha tinan lima nia laran sei halo esforsu boot hodi hasa’e produsaun iha rai-laran hodi nune’e bele atende nesesidade povu iha nasaun ne’e

“Ita-nia mehi ida maka molok to’o 2028 ita hakarak hetan ona produsaun ida di’ak tuir tarjetu nonu governu nian katak natar sira iha territóriu nasionál tenke atinje ona ektare rihun-50 kompara ba fó karik tenke iha ona 70% produsaun,” Ministru Marcos da Cruz ba TATOLI iha salaun enkontru MAPPF Comoro, kuarta (22/05).

Ministru Marcos hatutan, daudaun ne’e sira ninia alvu boot liu maka hasa’e produsaun foos no produsaun batar mezmu iha produsaun seluk mós tama iha alvu Ministériu nian maibé ninia produsaun mak sei ho kuantidade ki’ik mak hanesan Talas, ai-fariña, Ai-dila, modo-tahan sira inklui ai-fuan sira ne’ebé iha nutrisaun di’ak hodi nune’e bele hasa’e produsaun iha rai-laran atu komunidade sira bele konsumu liután.

“Ita-nia programa hasa’e produsaun iha setór agrikultór ne’e atu bele oferese ai-han ba ita-nia populasaun sira hodi han, mezmu Timor-Leste adere ona ba OMK maibé ita-nia polítika hasa’e produsaun rai-laran atu tulun populasaun sira ne’e sai ona mehi governu Timor-Leste nian dezde uluk kedan,” nia esplika.

Tuir governante ne’e katak Ministériu Agrikultura ho Pekuária, Peska no Floresta (MAPPF) iha devér duni atu hasa’e produsaun atu fó han ba povu sira, depois asesu ba produsaun ne’ebé iha ona foin esporta ba rai-li’ur. Tanba hare no kafé esporta ona ba rai-li’ur, maibé ninia produsaun maka sei ki’ik. Portantu ho planu Nonu Governu konstitusionál nian ne’ebé trasa ona, MAPPF sei esforsu hadi’a fasilidade sira hanesan infraestrutura bázika sira, inklui irrigasaun apoiu tratór ba natar sira iha territóriu nasionál hodi hasa’e produsaun di’ak liután.

MAPPF mós kontinua apoiu subsídiu mina ba agrikultór sira hanesan konbustível ba tratór sira hodi fila rai, apoiu fini, apoiu ai-moruk no adubu hodi aumenta produsaun iha rai-laran. Alende ne’e Ministériu mós kontinua tau prioridade hodi hasa’e produsaun animál iha rai-laran hanesan Karau, Bibi, Fahi, Manu no ikan sira hodi tulun mós populasaun sira atu bele konsumu.

“Ita nafatin prepara produsaun ikan iha fatin sira atu nune’e bele fornese ba ita- nia grupu sira atu hakiak hodi hasa’e ninia produsaun ha rai laran,” ezekutivu ne’e informa.

Agora Timor-Leste adere ona ba Organizasaun Mundiál Komérsiu (OMK) ne’e tuir Ministru Marcos katak ne’e di’ak tebes tanba bele loke ona oportunidade hodi bele asesu ba merkadu internasionál.

Entretantu, Orsamentu Jerál Estadu (OJE) 2024 alokadu ba MAPPF hamutuk 30.694.052 USD. Husi montante ne’e, entre programa sira seluk, aloka ba programa aumentu sustentável produtividade no produsaun mak 20.615.755 USD.

Notísia relevante:MAPPF sei distribui fini batar tonelada 79 ba tos-na’in iha munisípiu

Jornalista: Tomé Amado

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!