EKONOMIA, HEADLINE

Empreza Santos kompromete hakarak tulun Timor-Leste hodi dezenvolve projetu CCS   

Empreza Santos kompromete hakarak tulun Timor-Leste hodi dezenvolve projetu CCS    

Imajen/Natalino da Costa

DILI, 01 juñu 2024 (TATOLI)-Empreza petrolífera australiana, Santos Limited, hato’o prontidaun ba Governu Timor-Leste ba dezenvolvimetu projetu Kaptura no Armajenamentu Karbonu (CCS-Carbon Capture Storage), iha kampu Bayu-undan hafoin desmantelamentu ekipamentu produsaun petrolífera.

Kompromisu ne’ebé ho interese nakonu ne’e hato’o husi, CEO Empreza Petrolífera Santos Limited, Kevin Galaghe bainhira halo enkontru ho Ministru Petróleu no Rekursu Minerál (MPRM), Francisco Monteiro, ne’ebé akompaña husi Prezidente Autoridade Nasionál Petróleu (ANP), Gualdino da Silva, Prezidente Timor GAP, Rui Maria Alves Soares, sábadu ne’e.

Notísia relevante: Timor-Leste ho Austrália inisia diskusaun dezenvolve projetu CCS

Hafoin enkontru, Ministru Francisco, ba jornalista sira hateten Empreza Santos komprometidu kontinua apoia Timor-Leste ba dezenvolvimentu projetu Carbon Capture Storage (CCS) iha futuru bainhira produsaun mina Bayu-Undan ramata.

“Neste momentu parseiru sira husi Bayun-Undan nian empreza Santos no seluk seluk tán hatudu tiha ona interese katak depois produsaun Bayu-Undan ne’e para permanente ona, entaun ita sei konverta fasilidade balun iha rai ka balun ba  iha armazein no balun sai hanesan kabu ne’ebé mak ita dada husi Austrália uza nafatin ba projetu CCS”, Francisco Monteiro hateten ba Jornalista sira hafoin enkontru ho CEO Santos Limited iha edifísiu MPRM, Faról-Dili.

Tuir Governante ne’e enkontru ho CEO empreza Santos ne’e importante atu nune’e parte Governu bele halo diskusaun kle’an ho empreza Petrolífera ne’e kona-bá futuru projetu CCS.

“Enkontru ohin ne’e importante tanba ita koa’lia kona-bá ajenda importante ba projetu CCS iha futuru, ita planu ona katak pois de Bayung-Udan remata karik sei iha planu atu konverta Bayun- Udan ne’e ba projetu ida CCS. Iha ámbitu ida nee ami mós ko’alia kona-bá Bayu-Undan liuliu  kampu ida ne’ebé ke besik ona nia rohan, mas seidauk to’o nia rohan loloos,” nia adianta.

Daudaun, Governu hahú halo diskusaun maka’as ho kompañia petrolíferu sira kona-bá posizaun Timor-Leste nia hafoin produsaun Bayu-Undan hotu,  tama kedan ho projetu CCS hodi bele inklui Empreza estatál Timor GAP ba prosesu sira ne’e nia laran kedas.

“Ita halo ona diskusaun ho empreza Santos, maibé seidauk iha arkodu ruma ba futuru projetu CCS ne’e”, katak.

Iha fatin hanesan,  CEO Empreza Petrolífera Santos Limited, Kevin Galagher, afirma mai hasoru Ministru Petróleu no Rekursu Minerál hodi ko’alia liu kona-bá kestaun projetu CCS iha futuru.

“Ohin ami mai iha ne’e ami halo enkontru ho Ministru Petróleu Timor-Leste  iha enkotru ne’e ami diskute liuliu kona-ba  projetu CCS iha futuru no ami iha protidaun atu tulun Timor-Leste halp projetu ne’e,” nia afirma.

Empreza petrolífera australiana, Santos Limited, ne’ebé antes ne’e ho partisipasaun maioritária iha konsórsiu, reprezenta 43,4% iha operasaun petrolífera iha Bayu-undan, hamutuk ho empreza sira seluk iha interrese atu dezenvolve projetu CCS maibé Governu rai rua sei hare uluk enkuadramentu legál sira molok legaliza empreza sira ne’ebé atu envolve.

Naturalmente empreza Santos ho ninia parseiru sira ne’ebé dezenvolve projetu Bayu-undan nian sira maka iha koñesementu hotu kona-bá fatin ne’ebé atu tau CCS ne’ebá. Sira hatudu tiha sira-nia interrese ne’e iha tempu barak maibé iha faze ida atu Governu Timor-Leste prepara ninia enkuadramentu sira ho diskusaun kolaborasaun ho Austrália lai mak  tama ba faze tuir mai, katak oinsá atu fó lisensa ba sira no kontrata sira hodi bele kontinua projetu ne’e ba oin.

Empreza hirak ne’ebé halo korsórsiu ba operasaun produsaun petrolífera Bayu-undan maka Santos limited reprezenta kapitál 43,4% no restante pertense ba SK E&S 25%, INPEX 11,4%, Eni 11%, JERA (6,1%), no Tokyo Gas (3,1%).

CCS hanesan teknolojia atu kaptura no armazena karbonu iha rai-laran, ne’ebé konsidera hanesan esforsu ne’ebé halo atu halo redusaun emisaun CO2 iha atmosferu no hosi kampu gás balun ne’ebé iha kontíudu CO2 barak tebes.

Durante ne’e, projetu Bayu-undan kontribui ona reseita no finansia despeza Estadu, ne’ebé akumula iha fundu petrolíferu.

Notísia relevante:MPRM no IFC selebra akordu kona-ba Kaptura no Armazenamentu Karbonu

Jornalista: Natalino Costa  

Editór: Florencio Miranda Ximenes

iklan
iklan

Leave a Reply

iklan
error: Content is protected !!