SOSIEDADE SIVĺL

Delegasaun Vatikanu husu preparasaun ba apoiu saúde Papa Francisco nian

Delegasaun Vatikanu husu preparasaun ba apoiu saúde Papa Francisco nian

Papa Francisco. Imajen/Espesiál

DILI, 03 juñu 2024 (TATOLI)–Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten delegasaun Vatikanu husu preparasaun ba apoiu saúde Amu Papa Francisco niaan iha enkontru entre Vatikanu hasoru malu ho Governu no igreja lokal hodi halo inspesaun ba fatin sira-ne’ebé Papa atu vizita.

Notísia Relevante: Aban, ekipa avansadu Vatikanu observa fatin ba preparasaun misa 

“Iha enkontru entre Governu, igreja lokal ho ekipa delegasaun Vatikanu, foku rekomendasaun husi delegasaun mak oinsa kria kondisaun posivel atu Amu Papa labele sente kolen liuliu ho kestaun saúde no idade ne’ebé nia iha,” Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, ba jornalista sira iha Motael.

Arsebispu Arkidioseze Metroplitana Dili, Dom Virgílio Kardeál do Carmo da Silva, SDB. Imajen Tatoli/Francisco Sony.

Kardeál esplika delegasaun fó énfaze ida-ne’e, tanba Amu Papa Francisco sei viajen dook ba Papua Nova Guine, molok hala’o vizita Estadu no vizita pastorál durante loron tolu, hahú husi 09 to’o 11 setembru 2024 iha Timor-Leste.

Nia hateten, iha hela preparativu ba vizita sua santidade Papa Francisco ne’ebé iha ona odamatan bele dehan katak fulan tolu tan, no tempu hahú dadaun fulan tolu ikus sai ona preparasaun makaas atu hadi’a preparasaun vizita Amu Papa Francisco nian.

“Tanba ne’e, ohin, ita iha segunda vizita delegasaun husi Vatikanu ne’ebé to’o horibainrua sábadu, ohin mak enkontru ofisial ida ho igreja Lokal no Estadu nunsiatura atu haree liuliu buat ne’ebé ami ko’alia tiha ona iha janeiru la’o to’o iha ne’ebé no saída mak presiza hadi’a. Haree programa sira atu hadi’a no mellora,” nia dehan.

Tuir nia, iha valiasaun ne’e atu hare kona-ba protokolu, seguransa, tékniku liuliu liga ho parte igreja, aprezenta programa sira no fatin sira-ne’ebé Papa Francisco sei vizita no la’o liu.

Kona-ba ekipa preparasaun ba simu no atendimentu ba Amu Papa Francisco nia saúde, Ministru Administrasaun Estatál (MAE), Tomás Cabral hatán, Governu sei esforsu hamutuk ho Ministériu Saúde hodi responde no Papa Francisco mós sei iha ekipa médiku ne’ebé sei akompaña ho aviaun ida durante viajen no estadia iha Timor-Leste.

“Ita mos sei halo verifikasaun ba ospitál no klinika sira rai-laran hodi haree, maibé iha ekipa médiku hamutuk ho Papa iha viajen ne’e,” Ministru Tomás Cabral hateten ba jornalista sira, iha Motael.

Reprezentante Vatikanu iha Timor-Leste, Núnsiu Apóstolika Marco Sprizzi, hateten ema 16 husi  Vatikanu ne’e hanesan ofisiál ida ho sinál boot Vatikanu nian kona-ba preparasaun hamutuk ho igreja lokal no Governu atu simu Papa Francisco vizita Timor-Leste.

“Agora ita servisu atu buat hotu iha kondisaun di’ak ba preparasaun Timor-Leste nian,” Reprezentante Vatikanu iha Timor-Leste, Núnsiu Apóstolika Marco Sprizzi, hateten.

Marco Sprizzi dehan, Governu, Igreja lokal no Vatikanu iha empeñu ho nível másimu atu garante ba povu Timor-Leste hetan enkontru istóriku atu hanoin hetan beibeik vizita ida-ne’e, ho Papa Francisco mai Timor-Leste.

Notísia Relevante: Ekipa Vatikanu sei avalia tan preparasaun simu Papa Francisco iha juñu

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!