SAÚDE

Papa Fransico prezide misa iha Tasi-Tolu, MS prepara profisionál saúde kuaze 200

Papa Fransico prezide misa iha Tasi-Tolu, MS prepara profisionál saúde kuaze 200

Profisionál saúde. Imajen TATOLI/António Gonçalves.

DILI, 04 juñu 2024 (TATOLI)–Vise-Ministru Fortalesimentu Institusionál Saúde, José dos Reis Magno, hateten Ministériu Saúde (MS) prepara ona ekipa profisionál saúde sira ba primeiru sokoru kuaze 200 iha misa solene ne’ebé Papa Francisco prezide iha Tasi-Tolu iha setembru 2024.

Notísia Relevante: Delegasaun Vatikanu husu preparasaun ba apoiu saúde Papa Francisco nian

Tanba, nia hateten, iha ona ekipa voluntáriu ba primeiru sokoru hosi Cruz Vermelha Timor-Leste ne’e ona ema 500-resin.

“Númeru profisonál saúde ne’ebé bem treinadu hodi aloka ba iha ne’ebá menus hosi 200 pesoas. Ita, Timor-Leste preparadu, ita-nia sistema preparadu hela. Hospital Nasionál Guido Valadares no sentru saúde sira, ita fó ona servisu ba sira. Iha Dili laran, Amu Papa sei liu, entaun ami preparadu hela,” Vise-Ministru Fortalesimentu Institusionál Saúde ne’e hateten ba jornalista sira, hafoin vizita delegasaun Vatikanu halo inspesaun iha iha HNGV.

MS mós sei monta profisionál saúde sira iha pontu importante sira hanesan aeroportu Internasionál Prezidente Nicolau Lobato, Comoro, Dili, Hotel Timor, Timor Plaza, no MS mos tau ekipa permanente atu bele fó apoiu bainhira nesesita.

Governante ne’e mos hateten, halo reabilitasaun ba edifísiu sala emerjénsia ezistente hodi separa atendimentu pediatria no ba ema adultu hodi responde ba eventu boot iha setembru, atu bele dedikadu di’ak liután servisu ne’e.

“Reabilitasaun ne’e lalais de’it, tanba la’ós halo foun maibé kuartu sira-ne’e hotu. Ita sei halo karta ida ba Konsellu Administrasaun Fundu Infraestrutura,” nia hateten.

Vise-Ministru mós hateten, MS sei verifika fatin Tasi-Tolu hodi bele mobiliza profisionál saúde ba iha ne’ebá, tanba iha multidaun sarani mak ba iha ne’ebá, entaun tenke prepara didi’ak.

Aleinde ne’e, nia hateten, Ministériu Saúde (MS) informa Governu mós sosa hela ambulansia foun lima (5) no sei to’o iha Timor-leste iha fulan-agostu 2024.

“Prosesu aprovizionamentu Servisu Nasionál Ambulansia (SNAEM) halo ona, ita espekta katak iha agustu ne’e bele to’o. Ambulánsia hamutuk lima, maibé ne’e planea ona iha OGE 2024 nian ho orsamentu hamutuk rihun $300,” nia dehan.

Notísia Relevante: Ekipa Delegasaun Organizadora Vatikana halo inspesaun ba Aeroportu Comoro

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!