INKLUZAUN SOSIÁL

Governu iha kompromisu atu establese Sentru Nasionál Reabilitasaun iha Baucau

Governu iha kompromisu atu establese Sentru Nasionál Reabilitasaun iha Baucau

Diretór Jerál Sentru Nasionál Reabilitasaun (CNR, siglá portugés) Becora, Alexandre Morais. Imajen/TATOLI.

DILI, 06 juñu 2024 (TATOLI)—Governu liuhusi Ministériu Solidariedade Sosiál no Inkluzaun (MSSI) iha kompromisu atu estabelese Sentru Nasionál Reabilitasaun (CNR, siglá portugés) iha munisípiu Baucau hodi sentraliza serbisu atendimentu besik liután ba Ema ho Defisiénsia (Ehd) sira.

“Governu Konstitusionál da-sia (IX) no Sentru Nasionál Reabilitasaun nia planu rasik durante períodu tinan lima, hakarak ka lakohi, ita sei estabelese Sentru Nasionál Reabilitasaun ida hanesan iha Baucau, nune’e bele kobre atendimentu ba ema ho defisiénsia sira iha munisípiu Baucau, Viqueque no Lautém,” Diretór Jerál Sentru Nasionál Reabilitasaun (CNR, siglá portugés) Becora, Alexandre Morais, hateten ba Agência Tatoli liuhusi programa “Entervista Eskluziva” iha estúdiu Ajénsia Tatoli, Faról, kinta ne’e.

Tanba ne’e, iha trimestre dahuluk ne’e, nia dehan, Sentru Nasionál Reabilitasaun (CNR, siglá portugés) rasik komesa halo ona aproximasaun enkontru ho prezidente autoridade munisípiu Baucau no parte autoridade munisípiu rasik aseita no planu ida-ne’e.

Diretór Jerál Sentru Nasionál Reabilitasaun (CNR, siglá portugés) Becora, Alexandre Morais. Imajen/TATOLI.

Sentru Nasionál Reabilitasaun Becora ne’e, tutela iha MSSI ho parte sentru solidariedade Baucau nian tanba sira iha rai ne’ebé halo hela koordenasaun la’o hela, nune’e parte CNR rasik halo hela koordenasaun hodi oferese rai estabelese sentru ne’e.

Ba polítika no programa tinan ne’e, Sentru Nasionál Reabilitasaun (CNR, siglá portugés) sei halo uluk koordenasaun no iha tinan 2025 bele tau ona orsamentu hodi estabelese sentru refere iha Baucau.

“Ami-nia mehi antes mandatu ramata sentru ida tenke estabelese ona iha Baucau,’” nia hateten.

Tuir planu, estratéjiku CNR nian sei estabelese mós sentru nasionál reabilitasaun iha Ermera, maibé sei halo avaliasaun hodi haree ba jeografikamente husi munisípiu ne’e rasik.

Ho estabelesimentu sentru ne’e, nia hateten, atu sentraliza serbisu ba iha rejiaun rua hanesan Baucau ho Ermera, tanba bazeia ba sensu 2010 ne’e dadus ema ho defisíensia parte rejiaun ne’e mak barak liu, maibé polítika prioridade Governu Konstitusionál da-sia nian durante mandatu sei estabelese uluk sentru ne’e iha Baucau.

“Kompromisu Governu Konstitusionál da-sia nian mak serbisu reabilitasaun ho modelu hanesan ne’e labele sentraliza de’it iha Dili, tanba dezde iha tinan 2005 akontese tiha ona iha Dili maibé nunka alarga ba to’o munisípiu sira,” nia hateten.

Sentru Nasionál Reabilitasaun ne’ebé harii iha Becora ne’e hahú iha 2005 no momentu ne’eba organizasaun naun governamentál lokál ida mak harii sentru ne’e, maibé depois Governu mós fó apoiu orsamentu hotu ba serbisu sentru ne’e nian.

Nune’e, nia dehan, Governu iha kompromisu katak serbisu atendimentu sira hanesan ne’e mós importante, atu nune’e Governu tau matan ho másimu hodi nune’e haforsa serbisu sentru ne’e di’ak liután mak oinsá fó atendimentu ba ema ho defisiénsia sira.

Ho nune’e, iha tinan 2013, Governu kria dekretu-lei númeru 37/2012, hodi muda estatutu sentru ne’e sai fali instituisaun Governu nian ne’ebé mak tutela direta ba Ministériu Solidariedade Sosiál no Inkluzaun (MSSI), ho nia estatutu autónomu, administrativamente no finanseiru jere rasik ninia rekursu atu bele fó atendimentu ba ema ho defisiénsia sira.

Sentru Nasionál Reabilitasaun nia kna’ar prinsipál mak oinsá fó atendimentu espesiál ema ho defisiénsia sira liuliu ba ekipamentu mobilidade sira, iha parte seluk fisioterápia, terapia foku ba ema ho defisiénsia ho kondisaun fíziku, apoiu kadeira roda no seluk tan.

Iha tinan ne’e, Sentru Nasionál Reabilitasaun (CNR, siglá portugés) hetan alokasaun Orsamentu Jerál Estadu (OJE) 2024 millaun $1-resin hodi kobre ba nesesidade atendimentu ba ema ho defisiénsia (Ehd) sira.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!