DILI, 21 juñu 2024 (TATOLI)–Empreza Sali-Magu Unipesoál, Lda, sei hatama tan ai-morukitem ai-moruk hamutuk 129 item kompostu nesesari, esensial no vital ba Institutu Nasionál Farmasia no Produtu Medikamentu (INFPM) iha fulan-juñu ne’e nia rohan.
Notísia Relevante: Empreza Sali-Magu hatama ona ai-moruk kontentór 6 ba INFPM
Sekretáriu ba Prezidente Komisaun Resesaun no Inspesaun iha Ministériu Saúde, Domingos Pinto Guterres, hateten aim-moruk hirak ne’e mak Folic Acid 1mg, Amoxicilina tablet 500mg, Atenolol 50mg, cloxacillin 500mg, Calcium Carbonate 500mg Promethazine HCL injection 25mg/ml no Paracetamol tablet 500mg.
“Item 129 ne’ebé atu tama mai ne’e ai-moruk hotu de’it. Ai-moruk sira stoc kout ka mamuk iha armajen ne’e, dalaruma nia tama bele halo kompletu kedas,” Sekretáriu Prezidente Resesaun iha Ministériu Saúde, hateten ba Agência Tatoli, iha Kampung Alor.
Empreza Sali-Magu Unipesoál, Lda, kontinua hatama medikamentu ba iha INFPM tanba kontratu ho Ministériu Saúde ne’e ramata iha fulan-jullu oin mai.
Iha fulan-maiu nia rohan ne’e, nia dehan, Empreza Sali-Magu hatama ai-moruk item 70-resin kompostu hosi reajente no soru 31, ai-moruk item 36, ai-moruk espesial item rua (2) no ba kardiovaskulár item ida (1).
Tuir nia, ai-moruk sira-ne’ebé tama uluk ona mai ne’e distribui ona ba iha ospitál no munusipiu sira hanesan soru, reajente no medikamentu.
Antes ne’e, Diretór Empreza Sali-Magu Unipesoál, Lda, Sansão Gomes, informa Sali-Magu hatama ona item 400 kompostu hosi ai-moruk, reajente no soru ba iha INFPM.
Notísia Relevante: Ai-moruk “stock out”: Governu aloka millaun $8 ba INFPM atu sosa ai-moruk
Jornalista : Jesuína Xavier
Editór : Cancio Ximenes
