Bispu husi Austrália-NTT sei partisipa misa solene iha Tasi-Tolu
DILI, 25 juñu 2024 (TATOLI)–Bispu sira husi Austrália no Nusa Tenggara Timur-Indonézia sei Peregrinu husi Austrália no Nusa Tenggara Timur-Indonézia daudaun ne’e organiza malu atu partisipa iha misa solene ne’ebé Papa Francisco prezide iha Tasi-Tolu, iha loron 10 setembru 2024, iha tuku 16h00 lorokraik.
Notísia Relevante: Papa Francisco sei prezide misa solene iha Tasi-Tolu iha 10 setembru
“Klaru, bispu sira-nia vida ne’e iha kolejialidade bispu sira-nian. Aleinde Papa nu’udar ulun boot igreja nian, nia mós hanesan bispu ida iha Roma. Entaun, konserteza Papa hanesan bispu, nia kolega sira bispu hakarak atu hamutuk iha eventu Eukaristia sira hanesan ne’e. Se Papa atu mai, nia kolega sira bispu ne’ebé iha posibilidade, sira bele mai. Tanba hanesan iha kolejialidade, sira hanesan belun no maun-alin iha dalan ida-ne’e no iha momentu espesiál sira hanesan,” Pároku Igreja Santo António Motael, Guilhermino da Silva, hateten ba Agência Tatoli liuhosi “Entrevista Eskluziva” ho topiku “Preparasaun Igreja ba Vizita Papa Francisco”, iha Faról, segunda 24 juñu 2024) ne’e.
Nia hateten, iha ona verbalmente bispu na’in-rua (2) husi NTT fó sira-nia hakarak atu mai partisipa misa solene iha Tasi-Tolu, maske Papa Francisco mós hala’o vizita pastorál iha Jakarta-Indonézia iha 03-05 setembru 2024, sira hakarak ba iha ne’ebá tanba pertense sira-nia konferénsia episkopál.
Nune’e mós, nia hateten, komisaun organizadora mós sei fó konvite ba bispu sira iha Darwin-Austrália, atu sira mós bele mai partisipa iha eventu misa pontífise nian ne’e.
Aleinde ne’e, iha peregrinu husi Austrália no Nusa Tenggara Timur-Indonézia ne’ebé daudaun ne’e organiza malu atu partisipa misa solene ne’ebé Papa Francisco prezide iha Tasi-Tolu.
Nia hateten, grupu kiik-oan sira husi estranjeiru hanesan Austrália no NTT-Indonézia ne’ebé organiza malu ne’e mak hanesan husi Darwin, Adelaide, Brisbine no Timor Osidentál komesa ona kontatu ho komisaun organizadora ba eventu vizita Amu Papa ninian atu hetan fatin.
“Ema malae mutin sira hosi Austrália hanesan grupu kiik-oan sira organiza malu ema na’in-40 no 50, la’o hamutuk atu mai iha loron ne’e no daudaun ne’e buka hela fatin atu hela. Sarani sira husi Kupang-Indonézia sei partisipa mós misa solene ne’e. Sira-nia hela fatin mak iha uma COVID-19 nian iha Tasi-Tolu. Se númeru boot-liu, Governu sei prepara fatin iha Pelikan Paradise nian ba sira,” nia dehan.
Tuir nia, sarani sira husi rai-li’ur ne’e sei mai iha loron ida de’it no fila kedas maibé depende situasaun, tanba ida-ne’e asuntu igreja nian maibé ne’e mós asuntu nasaun nian, nune’e politikamente ne’e Governu nia kompeténsia.
Notísia Relevante: Papa Francisco sei hasoru malu ho juventude 3.000 iha 11 setembru
Jornalista : Jesuína Xavier
Editór : Cancio Ximenes
