DILI, 28 juñu 2024 (TATOLI) – Prezidente Bee Timor-Leste, Empreza Públika (BTL, E.P), Carlos Peloi, informa, entre Janeiru no Juñu tinan ne’e, empreza rekolla reseita hamutuk rihun $589 ba kofre Estadu.
Prezidente ne’e relata katak orsamentu ba BTL iha tinan ne’e hamutuk millaun $6 no Ministériu Finansa fó projesaun atu iha 2024 ne’e tenke rekolla reseita to’o millaun $1,2.
“Foin fulan neen ita konsege rekolla ona rihun $589 ba Estadu. Ami fiar katak ramata tinan ne’e sei arrekada tuir alvu no dalaruma bele liu”, Carlos Peloi dehan iha Ministériu Negósiu Estranjeiru no Kooperasaun (MNEK), Dili, ohin.
Reseita sira ne’ebé hetan ne’e mai husi kontribuisaun komunidade nian banhira ekipa BTL bá monta kontadór, populasaun sira sosa bee-moos no utiliza sentru tratamentu bee-foer iha Tíbar.
Dirijente ne’e salienta katak serbisu BTL nian la’ós haree de’it ba rekolla reseita, maibé lori bee ka halo manutesaun ba sistema abastesimentu bee-moos sira ne’ebé eziste hodi funsiona durante oras 24 nia laran atu komunidade bele asesu.
“Ita-nia serbisu importante liu mak asegura sistema bee ne’ebé iha no promove projetu sira ba iha populasaun hotu ne’ebé seidauk asesu bee-moos”, nia esplika.
Serbisu seluk mak promove projetu foun mak halo melloramentu ba sistema abatesimentu bee iha komunidade ne’ebé seidauk asesu bee-moos ka sira ne’ebé asesu ona, maibé bee la sufisiente.
“Entaun, ita-nia foku ne’e oinsá halo melloramentu ba sistema ne’ebé iha ona. Ne’ebé, ita-nia prezensa agora ne’e iha postu administrativu 23 iha munisípiu 12. Husi projetu melloramentu ne’e, postu tolu mak agora asesu ona bee-moos 24h00”, dehan.
Postu administrativu tolu ne’ebé asesu ona bee-moos iha oras 24 nia laran mak Vemasse iha Baucau, Mehara no Tutuala iha Lautém.
Nia salienta katak husi postu administrativu sira ne’ebé eziste iha territóriu, 23 mak daudaun BTL halo ona melloramentu ba sistema abastesimentu bee no tolu hetan ona inagurasaun. Ba postu sira seluk, BTL seidauk halo intervensaun maske nia planta no kadernu enkargu (BoQ, sigla inglés) kompletu ona, maibé sei iha prosesu nia laran.
Aleinde postu, iha mós suku ida ne’ebé daudaun asesu ona bee-moos iha oras 24 nia laran no sistema ne’e uza hotu ona kontadór ne’e mak suku Cribas iha Manatuto.
Kliente BTL ne’ebé asesu ona bee-moos iha territóriu hamutuk uma-kain rihun 37, ida ne’e sistema BTL mak jere no la inklui parseiru sira ne’ebé apoiu bee-moos ba komunidade.
Notísia relevante: BTL, E.P presiza hadi’a instalasaun kontadór hodi rekolla reseita ba Estadu
Jornalsita: Arminda Fonseca
Editora: Maria Auxiliadora
