DILI, 01 Jullu 2024 (TATOLI)–Jerente Empreza JOVA Construction Unipesoál, Lda, Jaime D.S Gusmão, hateten daudaun ne’e obra reabilitasaun ba Sentru Konvensaun Dili (CCD, sigla portugés) atinje ona 95% no sei entrega iha fulan ida-ne’e nia klaran.
Notísia Relevante: Papa Francisco sei hasoru malu ho juventude 3.000 iha 11 setembru
Nia esplika, obra reabilitasaun ne’e hela de’it 5% ne’e hanesan hela monta sanita ka toilet ba ema Verry Important Person (VIP) no taka azulezu ba haris fatin no kalen ne’ebé sei termina iha semana ida-ne’e nia laran.
Tuir nia, iha mós servisu nahe pavimentu iha kampu nia kotuk ne’ebé komisaun organizadora mós rekomenda foin lalais iha semana kotuk, nune’e sei termina iha semana oin.
“Atinje ona 95%, hela de’it mak pavimentu no toilet ne’e de’it. Ne’eduni, semana oin ne’e, sei termina. Ami-nia planu iha jullu nia klaran ne’e, ami entrega ona, se sira la rekomenda tan buat ruma,” Jerente Empreza JOVA Construction Unipesoál, Lda, Jaime D.S Gusmão, hateten ba Agência Tatoli iha Sentru Konvensaun Dili, Merkadu Lama, segunda ne’e.
Nia dehan, bazeaia ba rekomendasaun hosi delegasaun Vatikanu ba empreza hodi kria ka konstrui kondisaun rampa no kazadebañu ba amu Papa ne’e mos termina hotu ona.
“Toilet ba Santo Padre Papa nia ne’e prontu hotu ona. Ami alarga tan, tanba Papa Francisco nia kadeira roda ne’e,” nia dehan..
Nia esplika, rampa sira-ne’ebé ekipa delegasaun rekomenda ba iha empreza mós hotu tiha ona, tanba ekipa monta hotu ona Air Conditioner (AC) no ligasaun eletrisidade ba jeradór.
Iha Sentru Konvensaun Dili, tuir planu, Papa Francisco halao vizita apstorál iha Timor-Leste durante hahú 09-11 setembru ne’e, Papa sei hala’o sorumutu ho reprezentante juventude Katólika iha Timor-Leste hamutuk 3.000 iha 11 setembru 2024 dadeersan, antes Papa Francisco voo ba Singapura.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
