DILI, 02 jullu 2024 (TATOLI)–Reitór Universidade Nasioál Timor Lorosa’e (UNTL), Francisco Martins no Ministru Administrasaun Estatál (MAE), Tomás Cabral, asina akordu hodi koloka estudante Departamentu Siénsia Administrasaun Públika hodi hala’o estájiu iha suku no aldeia sira iha teritóriu.
Ministru Administrasaun Estatal (MAE), Tomás Cabral, hateten akordu ne’e sei importante tebes no funsiona di’ak tebe-tebes hodi hala’o no kria administrasaun públika ho di’ak.
“Pontu ida di’ak tebe-tebes ita atu la’o. Tanba, ita mais tinan 20 ona maibé ita lakonsege kria administrasaun públika idaké di’ak,” Ministru Administrasaun Estatál (MAE) ne’ e hateten iha nia diskursu iha serimónia halo asinatura akordu entre UNTL ho MAE, iha Motael.
Akordu ne’e hanesan apoiu ida atu reforsa administrasaun públika iha nível suku, haforsa identifikasaun patrimóniu Estadu hanesan rai Estadu no identifikasaun populasaun.
Reitor Universidade Nasioál Timor Lorosa’e (UNTL), Francisco Martins, esplika akordu entre instituisaun rua ne’e atu reforsa administrasaun públika iha suku liuhosi estájiu estudante sira-nian.
“Akordu kooperasaun entre UNTL ho Ministru Administrasaun Estatál atu servisu hamutuk hodi apoia ita-nia administrasaun. Ami-nia estudante sira Departamentu Siénsia Administrasaun halo estájiu iha suku sira no sira bele fó asisténsia hodi moderniza sistema administrasaun,” nia hateten.
Liuhusi akordu ne’e, nia dehan, fasilita mós dosente no estudante sira atu partilla esperiénsia kona-ba administrasaun ho xefe suku sira.
Reitór UNTL ne’e dehan, akordu iha durasaun tinan haat (4) no sei implementa iha tinan ne’e, maibé iha mós oportunidade ba estudante iha departamentu sira seluk hanesan saúde, enjiñeria no seluk tan atu bele hala’o estájiu.
“Bele iha estájiu integradu, estudante sira hanesan fakuldade saúde bele ba iha sentru no postu saúde sira no agrikultura bele serbisu hamutuk ho komunidade to’os-na’in sira,” nia dehan.
Husu kona-ba númeru estudante ne’ebé sei hala’o estájiu anualmente, reitór ne’e hatán, laiha númeru serteza tanba estudante barak loos.
Jornalista : Jesuína Xavier
Editór : Cancio Ximenes
