DILI, 04 Jullu 2024 (TATOLI) – Primeiru-Ministru (PM), Kay Rala Xanana Gusmão, apresia ba hanoin di’ak husi empreza Timor Port hodi kuda Ai-Parapa hamutuk 11.350 iha tasi-ibun Tíbar tuir kompromisu ne’ebé sira halo antes halo konstrusaun ba Portu Baía Tíbar.
Xefe Governu dehan programa kuda Ai-Parapa ne’e atu konserva fali biodiversidade ne’ebé moris iha zona kosteira Tíbar nian, tanba área ne’e durante konstrusaun Portu Tíbar kuaze ai barak maka mate, maibé ho programa kuda filafali Ai-Parapa ne’e sei konserva filafali balada sira iha tasi Tíbar.
“Ha’u mai partisipa serimónia kuda Ai-Parapa. Ha’u haree atividade ne’e di’ak tebes no apresia ba Timor Port ne’ebé iha interese hodi kontribui ba hadi’a fali kondisaun iha área kosteira Tíbar ne’ebé kuaze Ai-Parapa lubuk ida maka mate, tanba impaktu husi konstrusaun portu ne’e rasik”, Xanana Gusmão dehan iha Portu Tíbar, ohin.
Xefe Ezekutivu ne’e salienta asaun ne’ebé Timor Port halo hodi realiza atividade kuda Ai-Parapa ne’e hatudu ona responsabilidade sosiál husi emprezáriu sira. Tanba ne’e, Governu sei apoia hanoin di’ak sira ne’e hodi kria duni ambiente ida saudavel atu hametin kompromisu ida ba biodiversidade atu kuda mós Ai-Parapa, nune’e bele salva espésie sira ne’ebé mak moris iha tasi-laran labele mate.
Ai-Parapa ne’ebé Timor Port prepara atu kuda iha zona kosteira ka tasi-ninin Tíbar nian hamutuk 11.350 no ohin primeiru-ministru lansa simbolikamente ona no kontinuasaun ba oin sei envolve autoridade suku sira hamutuk ho komunidade maka sei organiza hodi kontinua kuda tan ai sira ne’e atu hamatak fali tasi-ninin sira, nune’e bele fó fatin ba ikan sira inklui ahu-ruin no espésie sira seluk bele aumenta sira-nia númeru populasaun.
Responsavel Timor Port, Rafael Mendes Ribeiro, hateten bainhira halo konstrusaun ba Portu Tíbar iha rekerimentu ida ne’ebé empreza tenke asume ho responsabilidade maka presiza konserva filafali Ai-Parapa sira bainhira portu ne’e remata ona.
“Ohin, ami mai kumpre kompromisu ne’ebé halo ona iha akordu sira hodi hahú konserva fali tasi-ninin sira ho kuda Ai-Parapa barak liu atu konstrui hikas ita-nia tasi hodi kuidadu balada sira ne’ebé moris iha tasi-laran”, salienta.
Iha fatin hanesan, Prezidente Autoridade Liquiçá, Paulino Ribeiro, agradese ba Timor Port tanba ho kompromisu ne’ebé halo ona ho Governu, katak depois konstrusaun portu ne’e remata sira sei konserva filafali tasi Tíbar liuhusi kuda Ai-Parapa no ohin hatudu ona realidade.
Tanba ne’e, nia husu ba komunidade iha suku Tíbar atu serbisu hamutuk ho autoridade sira hodi kuidadu ambiente iha tasi Tíbar no halo fatin ne’e sai sítiu turístiku ida atu atrai turista sira vizita fatin ne’e.
Notísia relevante: SEF kontinua dezenvolve Ai-Parapa iha área kosteira
Jornalista: Tomé Amado
Editora: Maria Auxiliadora
