DILI, 09 Jullu 2024 (TATOLI)–Arsebispu Arkidioseze Metropolitana Dili, Dom Virgilio Kardeál do Carmo da Silva, SDB, hateten igreja no Governu sei prepara transporte gratuita ba sarani sira husi munisípiu hodi bele partisipa misa solene ne’ebé Papa Francisco prezide iha Tasi-Tolu, iha 10 setembru 2024, iha tuku 16h30 lorokraik.
Notísia Relevante: Papa Francisco sei prezide misa solene iha Tasi-Tolu iha 10 setembru
“Ida-ne’e sai inisiativa Governu nian ida di’ak. Tuir rezulatdu enkontru ne’e, Governu maizumenus sei aloka mós verba ida ba iha kada munisipiu. Kada munisipiu hetan rihun $40 hodi ajuda transporte,” Arsebispu Arkidioseze Metropolitana Dili ne’e hateten ba jornalista sira liuhusi konfrénsia imprensa ne’ebé realiza iha Episkopál, Lecidere, tersa ne’e.
Sarani sira maihusi parokia iha territóriu ne’e, bispu ne’e dehan, ida-ne’e responsabiliza husi ekipa Governu nian ne’ebé fó apoiu tomak ba iha servisu lojistiku ninian.
Tanba ne’e, tuir nia, dezde inisiu Governu fó hanoin mós ba igreja, prezidente munisipál, Polisia Nasionál Timor-Leste no autoridade lokal sira hodi organiza ema hira mak atu mai.
Notísia Relevante: Governu autoriza despeza to’o millaun $12 ba preparasaun vizita Papa Francisco
Sarani sira husi munisipiu ne’e, Governu no igreja deside hodi prepara ona fatin konsentrasaun molok ba tuir misa iha Tasi-Tolu.
“Governu hamutuk ho autoridade lokal identifikadu ona fatin sira hanesan Hera, Kasnafar-Beduku no Tibar ba sarani sira husi munisipiu sira atu konsentra,” nia dehan.
Amu Salesiano ne’e hateten, Governu hakarak hatudu vontade no fó apoiu ba kreda hodi hakmaan sarani no peregrinu sira, tanba ne’e vizita pastorál no espirituál amu Papa Francisco ninian mai iha Timor-Leste.
Notísia Relevante: Governu-Igreja prepara fatin konsentrasaun haat ba sarani sira
Jornalista : Jesuína Xavier
Editór : Cancio Ximenes
