OÉ-CUSSE, 10 jullu 2024 (TATOLI) – Ekipa konjunta husi Terra Propriedade, Diresaun Rejionál Infraestrutura no Diresaun Rejionál Agrikultura, halo reverifikasaun dadus ba komunidade afetada ba konstrusaun estrada iha bairru Masin, suku Costa, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) hodi prepara ba halo indemnizasaun.
Diretór Terra no Propriedade, Júlio Coel, informa objetivu halo reverifikasaun ne’e bazeia ba enkontru ne’ebé hala’o ona antes iha suku Costa entre komunidade afetadu no tékniku sira, ne’ebé iha ona konkordánsia.
Tuir nia, tanba estrada foun ne’ebé loke husi bairru Masin liga bá bairru Palaban ho distánsia kilómetru 500-resin ne’e inisia kedas iha 2016, maibé to’o ohin loron seidauk iha solusaun, tanba lahalo indemnizasaun ba rai, plantasaun no uma.
“Entaun, ohin ne’e ekipa komposta husi Terra no Propriedade, Diresaun Rejionál Infraestrutura no Agrikultura tuun no dadus balun iha ona, tanba ne’e ekipa atu halo reverifikasaun”, Júlio Coel ko’alia iha bairru Masin.
Notísia relevante: Abitante afetadu 16 iha Masin Oé-Cusse sei kolabora ho Governu
Nia informa katak prosesu reverifikasaun ne’e halo, tanba antes ne’e balun hetan ona indemnizasaun ba plantasaun no balun hetan ona apoia materiál konstrusaun nian husi autoridade anteriór.
“Ohin, ita kontinua atu hetan dadus loloos. Faze tuirmai bazeia ba lei númeru 13/2017, ita sei públika ba rai sira-ne’ebé afetadu ho durasaun tempu loron 30. Kuandu laiha kontestasaun ruma ita kontinua ba faze preparasaun ba pagamentu. Maibé, rai ne’ebé sei disputa entre komunidade sira ita sei kansela”, nia adianta.
Xefe suku Costa, Fransisco Colo, rekomenda ba ekipa téknika ne’ebé halo persiza promove komunikasaun di’ak ho komunidade, nune’e bele iha solusaun hodi kontinua estrada ne’e.
“Komunidade sira-ne’ebé afetada ba estrada ne’e, ha’u ko’alia nakloke ho sira tanba ita nu’udar sidadaun persiza mós kontribui ba dezenvolvimentu. Entaun, solusaun mak persiza komunika didi’ak ho komunidade, tanba Governu mak komunidade, komunidade mak Governu”, nia fó hanoin.
Notísia relevante: Autoridade RAEOA hahú rekolla dadus hafoin halo pagamentu ba komunidade afetadu projetu ZEESM
Abitante afetadu José da Cunha dehan nia lahalo impedimentu ba dezenvolvimentu, maibé importante mak konsidera sira, tanba rai ne’e na’in iha no bainhira ekipa bá konsulta didi’ak sei hetan kolaborasaun.
“Ami prontu oferese, importante halo kompensasaun. Tuir loloos estrada ne’e finaliza ona iha tinan hirak liubá, maibé ami lakoi entrega rai, tanba la konsidera no hadau de’it povu nia rai”, nia realsa.
Maske nune’e, nia agradese tanba ho xefe suku atuál buka ona solusaun hamutuk ho povu atu oinsá bele rezolve liuhusi diálogu, nune’e bele iha konkordánsia no ba futuru dezenvolvimentu la’o ho susesu.
Notísia relevante: Abitante afetadu 76 iha Costa hato’o pontu 12 ba Governu Sentrál no Autoridade RAEOA
Tuir dadus, komunidade afetada ba projetu ne’e hamutuk uma-kain 16.
Jornalista: Abílio Elo Nini
Editora: Maria Auxiliadora
