iklan

KAPITÁL

Konstrusaun altar iha Tasi-Tolu atinje ona 81%

Konstrusaun altar iha Tasi-Tolu atinje ona 81%

Konstrusaun prasa Vatikanu ho medida diametru 50 no altar ho metru 7x35 no sakristia juntamente ho toilet ba Papa Francisco, bispu no padre sira iha Tasi-Tolu ne’e atinje 81%. Imajen Tatoli/António Gonçalves Daciparu.

DILI, 10 jullu 2024 (TATOLI)—Konstrusaun prasa Vatikanu ho medida diametru 50 no altar ho metru 7×35 no sakristia juntamente ho toilet ba Papa Francisco, bispu no padre sira iha Tasi-Tolu ne’e atinje 81%.

Notísia Relevante: Konstrusaun altar no toilet ba VIP iha Tasi-Tolu atinje ona 76%-70%

Konstrusaun altar ne’ebé konstrui husi Empreza Karya Timor ne’e, tuir planu ssei konkuli iha fulan-agostu 2024.

“Uma haat ba sakristia nian, monta rangka ka kuadru membra (besi) ne’ebé tau iha uma-nia kakuluk no eskada ne’e, ami konta hamutuk ne’e mak atinje ona 81%,” Supervizór empreza Karya Timor, Soares da Costa, hateten ba Agência Tatoli, iha Tasi-Tolu, tersa ne’e.

Daudaun ne’e, traballadór sira monta ona rangka ka kuadru membra nian ne’e termina ona ho uma nia riin hamutuk 20.

Niune’e mós, empreza mós komesa taka ona azulezu tanba sira tau hotu ona marka iha fatin no medida ba taka azulezu ba konstrusaun altar nian.

Tuir nia, daudaun ne’e traballadór sira mós komesa halo atividade nahe pavimentu no sei kuda tan ai-funan.

Nia hateten, iha servisu adisionál ne’ebé Ajénsia Dezenvolvimenu Nasionál (AND) fó ba empreza mak atu nahe alkatraun iha prasa altar nian sori-sorin sira-ne’e, entaun sei hateru tan rai ne’e.

Entretantu, Arsebispu Arkidioseze Metropolitana Díli, Dom Vírgilio Kardeál do Carmo da Silva, SDB, hateten jerálmente igreja nia preparasaun ba Papa Francisco nia vizita pastorál iha Timor-Leste ne’e atinje ona 80%.

“Hahú juñu, ita fahe orasaun atu sarani sira reza ba amu Papa. Itá fahe mós manuál katekeze hamutuk rihun 15 ba kada Dioseze no to’o ona ba parokia sira, institutu no eskola ensinu sekundária no superior sira,” Arsebispu hateten.

Kardeál ne’e dehan, igreja mós prepara ona siboriu no tunika no fó formasaun ba ministru extraordináriu sira, treinu ka insaiu ba múzika liturjia sira no preparsaun espirituál seluk la’o hela.

“Preparasaun ne’e, hela de’it 20% no atu kontrola sasán sira-ne’e to’o kompletu,” amu bispu ne’e dehan.

Notísia Relevante: Empreza Karya Timor sei finaliza konstrusaun altar misa Amu Papa durante fulan-haat

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!