RAEOA oferese rai ektare 10 ba MKI estabelese sentru produsaun masin
OÉ-CUSSE, 12 jullu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, selebra, ohin, memorandu entendimentu (MoU) ho Ministru Komérsiu no Indústria (MKI), Filipus Nino Perreira, hodi oferese rai ektare 10 atu estabelese sentru produsaun masin iha lagoa Maesmone, iha suku Taiboko, sub-rejiaun Pante Makasar.
Ministru Nino Perreira informa katak asinatura nota ne’e tanba iha koordenasaun di’ak ho Prezidente Autoridade RAEOA no ho Zona Ekonomia Espesiál Dezenvolvimentu Oé-Cusse Ambeno (ZEEDOA) ba asuntu rai nian.
“Atu formaliza ida-ne’e persiza iha atribuisaun rai. Ohin, ita halo ona serimónia asinatura ba atribuisaun rai ho medida ektare 10, nune’e ita bele hahú ona prosesu estabelesimentu sentru produsaun masin iha suku Taiboko, ne’ebé oferese husi komunidade sira no ofisializa husi autoridade RAEOA”, Nino Pereira dehan ba jornalista sira, iha Oé-Cusse.
Notísia relevante: MCI identifika Lagoa Maesmone iha Oé-Cusse poténsia indústria masin
Governante ne’e salienta katak bainhira sentru ne’e estabelese, faze tuirmai prepara rekursu umanu, liuliu ba formasaun depois kontinua prepara estudu no dezeñu hamutuk ho parseiru ne’ebé serbisu hamutuk ba sentru produsaun ne’e.
“MKI hamutuk ho RAEOA, ita sei haruka ita-nia ema balun bá iha Indonézia, tanba ita dezenvolve hela kooperasaun téknika ida ho PT. Garam Indonézia, ita sei asina MoU ho sira, atu hahú ona aisténsia téknika ba ita-nia ema sira iha ne’e, tanba sei hahú iha tinan ne’e”, nia adianta.
Notísia relevante: MCI ho lia-na’in Taiboko realiza serimónia rituál molok lansa sentru produsaun masin iha Lagoa Maesmone
Prezidente Autoridade RAEOA, Rogério Tiago Lobato, sente satisfeitu tanba iha futuru bele halo ona produsaun masin iha Oé-Cusse.
“Ne’e inisiativa di’ak tanba ita hatama teknolojia foun atu dezenvolve ita-nia rekursu naturál sira. Tanba fatin ne’e besik kedan tasi-ninin, bele monta fábrika masin nian. Ha’u hanesan Prezidente Autoridade kontente no sei apoia investimentu ne’e”, nia asegura.
Tuir nia, importante liu mak loke postu traballu tanba bainhira iha ona fábrika produsaun masin sei presiza empregadór Oé-Cusse oan barak no ida ne’e di’ak tanba bele diminui dependénsia iha parte empregu nian ba Estadu hanesan prinsipál empregadór.
Notísia relevante: Governu hatuur fatuk dahuluk sentru produsaun masin iha Oé-Cusse
Rekorde katak, iha 21 juñu 2024, ne’e Governu liuhusi MKI hatuur ona fatuk dahuluk atu estabelese sentru produsaun masin iha suku Taiboko, sub-rejiaun Pante Makasar.
Jornalista: Abílio Elo Nini
Editora: Maria Auxiliadora
