DILI, 13 jullu 2024 (TATOLI) – Iha sábadu lorokraik ne’e, ekipa Relay Laleia FC husi Munisípiu Manatuto no DIT FC kompete malu hodi hadau terseiru lugar iha kompetisaun jogu, iha kopa Federasaun Futeból Timor-Leste (FFTL), iha Estádiu munisipál Dili.
Iha jogu ne’e, ekipa rua halo esforsu másimu hodi lori vitória ba idaidak nia ekipa ho fair play. Maibé, rezultadu ikus vitória pertense ba Relay Laleia FC tanba manan nia adversáriu DIT FC ho rezultadu sutu penalidade; 5-2. Susesu ida ba Relay Laleia FC iha nia jornada, iha kopa FFTL.
Ho golu tolu liu DIT FC, ekipa “Laleia anan” okupa uluk ona pozisaun terseiru lugar hodi hetan prémiu medalla ho osan hamutuk $7,5000.00. Enkuantu DIT okupa de’it iha kuartu lugar hodi hetan osan hamutuk $5,000.00. Maske nune’e jogu finál hodi buka primeiru lugar sei hala’o aban (14/07), iha ne’ebé sei kontra malu entre ekipa São José FC no B2B FC; bainhira se mak manán sai primeiru lugar sei simu premiu taxa, medalla ho osan $15,000.00 no segundu lugar sei simu osan hamutuk $10.000.00 ho medalla.
Iha sábadu lorokraik ho euforia adeptu sira, tuir oráriu jogu, apitu dahuluk lian husi Árbitru Pedro Braga husi Dili Timor- Leste, Estádiu Munisipál Dili ekipa adversária rua lansa kedan kontra no atake ba malu tuir tékniku no abilidade ekipa idaidak nian, tuir orientasaun treinadór idaidak, oinsá atu prodús golu.
Iha kompetisaun ne’e, DIT ho serbisu ekipa ne’ebé di’ak tuir kompeténsia koñesimentu no kapasidade: tékniku, tátika no estratéjia, halo Relay Laleia FC tenke halo esforsu maka’as. Maske nune’e, DIT konsege hatudu jogu bonitu halo Relay susar atu kombate iha batalla durante jogu la’o iha minutu primeira parte.
Iha kampu kuadradu Estádiu Munisipiu Dili, DIT domina bola hodi halo presaun maka’as iha minutu ba minutu; sutu barak mak avansadu DIT ezekuta maibé sutu hirak ne’e seidauk kona iha alvu.
Ekipa Dili ne’e nafatin halo presaun ba Relay Laleia FC. Pasa bola iha kampu laran Corner kick (sutu iha kantu), passing (pasa), clearing (prosesu trava bola iha ekipa nia área defeza rasik), etc, ekipa DIT halo Relay dada iis la di’ak. Nune’e, hanesan proverbiu dehan “Rezultadu sei la nega esforsu”, ho esforsu ekipa nian, DIT liuhusi nia jogadór João Pedro (10) iha minutu 8 konsege muda rezultadu 1-0 liuhusi golu bonitu ne’ebé nia prodús.
Maske DIT halo ona golu la hamate esforsu Relay nian. Jogadór sira nafatin unidade hodi hatudu jogu ne’ebé brillante, husi minutu ba minutu. Ho esforsu hirak ne’e la hela de’it hanesan esforsu tanba iha minutu 38 jogadór Relay Herboni Lopes (9) konsege prodús golu hodi muda rezultadu ba 1-1.
Golu ne’ebé Relay responde fó ksolok tebes ekipa sukaer-musan ne’e. Aumenta tan abilidade jogu ho brillante liuhusi pasa bola husi ain ba ain. Jogu furak ne’ebé Relay halo la hela de’it hanesan jogu, nune’e iha minutu 36 jogadór Joanico Pinto (8) realiza tan golu ida muda rezultadu ba 2-1.
Golu ne’e halo DIT tenke hasai liután sira-nia kosar iha kampo laran. Jogadór sira tenke hatudu jogu ho velosidade ne’ebé maka’as nune’e halo empata jogu ne’e.
Maibé esforsu hotu DIT halo labele responde golu iha minutu primeira parte, nune’e iha minutu primeira parte Relay provizóriu lidera jogu ho eskore 2-1.
Iha minutu 45 daruak, ekipa rua nafatin hatudu jogu ne’ebé kualidade, Relay tenta hadia nia performe husi lina ba lina, maibé la konsege kombate atake ne’ebé DIT halo.
Nune’e DIT hahú ‘ukun’ hikas bola hodi hamate tutuir jogu ne’ebé Relay halo. Nune’e iha minutu 48 husi minutu 90 tuir padraun jogu, Jogadór João Pedro lansa tan golu segundu hodi hametin rezultadu ba 2-2 to’o apitu finál husi Árbitru Pedro Braga, Árbitru ne’ebé lidera jogu entre ekipa adversáriu rua iha lorokraik ne’e. Ikusmai, vitória seidauk pertense ba ekipa ida, nune’e tenke avansa sutu penalidade.
Tuir padraun futeból nian, bainhira jogu ne’ebé determinadu hanesan finál, bainhira minutu 90 normál termina mak empata tenke avansa kedan ba sutu penalidade hodi koko sorte se mak ezekuta di’ak nia mak sei manán.
Iha sutu penalidade ne’e, Relay prepara jogadór lima no DIT mós prepara jogadór lima hodi sai ezekutadór. Iha sutu hirak ne’e DIT nia jogadór tolu la konsege sutu bola tama ba rede tanba salva husi guarda rede Relay. Enkuantu Relay nia jogadór na’in tolu konsege sai éroi hodi ezekuta sutu sira ho di’ak fó kedan vitória ba Relay.
No, vitória ne’e lori adeptu sira iha tribun hatudu sira-nia euforia hodi harame liután estádiu munisipál Dili to’o fahe malu, hodi hein jogu aban, entre ekipa São José FC no B2B FC hodi hadau primeiru lugar no runner up ka segundu lugar.
Jornalista: Hortencio Sanchez
Editór: Rafael Ximenes de A. Belo
