DILI, 19 jullu 2024 (TATOLI)–Progresu konstrusaun prasa vatikanu, sakristia inklui toilet ba Papa Francisco, bispu no padre sira, no altar ba misa solene iha Tasi-Tolu ne’ebé konstrui husi empreza Karya Timor ne’e besik atu konklui tanba atinje ona 87%.
Notísia Relevante: Konstrusaun altar iha Tasi-Tolu atinje ona 81%
“Altar atinje ona pelu menus 86-87%. Estrada atu fui aspal been ne’e atinje 80%,” Supervizór empreza Karya Timor ne’e hateten ba Agencia Tatoli, iha Tasi Tolu, sesta ne’e.
Nia dehan, empreza sei taka uma kakuluk iha membra, fui aspal iha estrada no nahe azulezu iha prasa no pavimentu haleu prasa altar nian.
Aleinde ne’e, nia hateten, konstrusaun ba sakristia ramata ona no agora hela monta de’it janela no sanita ba uma haat hodi konklui.
Tuir nia, materiál ba iha konstrusaun ne’e kompletu hodi aselera obra tanba hein atu tesi no monta de’it.
Nia hateten, iha fulan hirak liuba ne’e traballadór hamutuk 20 no agora servisu-na’in sira husi empreza ne’e aumenta tan atu reforsa servisu konstrusaun iha terrenu.
“Empreza kuda hotu ona ai-funan no du’ut haleu prasa vatikanu no altar ba misa solene ne’e,” nia dehan.
Konstrusaun altar no prasa vatikanu iha Tasi-Tolu ne’ebé konstrui husi empreza Karya Timor ho medida diametru 50, altar iha metru 17×35 ne’ebé gasta orsamentu millaun $1 ne’e sei termina iha fulan-agostu.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
