DILI, 22 Jullu 2024 (TATOLI) – Diresaun-Jerál Pekuária, Ministériu Agrikultura, Pekuária, Peska no Floresta (MAPPF) rejista fahi hamutuk 581 mak mate iha munisípiu Manufahi no Liquiçá, tanba afeta husi peste suína afrikana.
Diretór-Jerál Pekuária, Carlos António Amaral, dehan daudaun ne’e sira foin halibur dadus fahi mate iha Manufahi ho Liquiçá de’it, tanba munisípiu rua ne’e maka rejista númeru númeru aas liu.
“Husi Manufahi fahi mate mantein númeru 461, depois Liquiçá hamutuk 120”, Carlos Amaral informa iha Comoro, ohin.
Nia salienta katak iha munisípiu seluk mós akontese fahi mate, maibé la rejista ho númeru ne’ebé boot kompara ho munisípiu rua referidu, ne’ebé kada loron mate liu haat hahú kedan husi Abríl mai to’o ohin loron.
Fahi ne’ebé mate iha Manufahi ne’e mai husi postu Alas iha suku Dotik, Uma Berloi no Aitua, Same iha suku Betanu, Babulu, Kaituas, Letefoho no Holarua no Fatuberliu iha suku Kaikasa no Kais. Iha Liquiçá fahi mate ne’e barak liu iha postu Bazartete.
“Fahi mate iha Liquiçá ne’e haki’ak iha luhan laran, maibé iha Manufahi tanba komunidade sira la sulan, fahi la’o arbiru de’it depois ataka husi peste. Fahi sira ne’e mate subar tiha iha to’os laran bainhira dois ona maka komunidade foin hatene. Nune’e maka afeta ba fahi sira seluk mós hetan vírus refere. Asu sira ba han depois lori mai hada’et fali ba fahi sira ne’ebé kesi iha uma”, esplika.
Tanba ne’e, nia husu ba haki’ak-na’in iha territóriu atu sulan idaidak nia fahi, nune’e bele fó tempu ba veterinária sira atu hala’o sira-nia serbisu hodi halo vasinasaun.
Peste suína afrikana nu’udar moras virál ba fahi ida ne’ebé orijinadu husi Áfrika iha tinan 100 liubá. Maibé foun ba Timor-Leste, tanba Governu, liuhusi Ministériu Agrikultura foin deklara nia ezisténsia iha 27 Setembru 2019.
Notísia relevante: Fahi 25 mak mate iha sentru Dotik
Jornalista: Tomé Amado
Editora: Maria Auxiliadora
